Majarstanda jumys isteıtin qazaq: Elordaǵa qaıta kelgende óz kózime ózim senbedim

ÓSKEMEN. QazAqparat – Majarstanda muǵalim bolyp jumys isteıtin Raýshan Muqysheva Nur-Sultan qalasynyń birneshe jyldyń ishinde adam tanymastaı ózgergenin aıtty, dep habarlaıdy QazAqparat tilshisi.

«Táýelsiz Qazaqstan: Jasampazdyqqa toly jyldar. Shyǵys Qazaqstan oblysynyń basty jetistikteri» atty dóńgelek ústelge Majarstanda eńbek etip júrgen ShQO týmasy Raýshan Muqysheva onlaın formatta qatysty. Óz sózinde ol shetelde júrse de únemi Otanyndaǵy jańalyqtarǵa úńilip, ózgeristerdi qalt jibermeıtindigin aıtty.

«Elý jylda el jańa» deıdi qazaq. Bıyl elimizdiń egemendik alǵanyna 30 jyl tolyp otyr. Alǵashqy jyldary kóp qıyndyqty bastan keshirdik. Biraq tatýlyq pen bolashaqqa degen anyq baǵdardyń arqasynda onyń barlyǵy eńserildi. Búginde Qazaqstan álemniń kóshbasshy elderimen tyǵyz baılanys ornatqan, halyqaralyq arenada ózindik orny bar memleketke aınaldy. Táýelsizdigimizdi eń alǵash moıyndaǵandardyń qatarynda majar halqy boldy. Ózim toqsanynshy jyldardyń sońyna qaraı majar eline kóship, qazaq tili jáne ádebıeti páninen sabaq bere bastadym. Dos kóńildi eldegi bilim ordasynyń basshysy meni jumysqa ózi shaqyrdy», - deıdi Raýshan Muqysheva.

Pedagog elordaǵa birneshe jyldan keıin qaıta kelgende óz kózine ózi senbegendigin jetkizdi.

«Qysqa ýaqyt ishinde astanamyz adam tanymastaı ózgerdi. Záýlim ǵımarattar, sáýletti ınfrastrýktýra tamsandyrmaı qoımaıdy. Otanymda osyndaı ıgi ózgeristerdiń bolyp jatqany meni árkez qýantady. Barsha jerlesterimdi Táýelsizdiktiń 30 jyldyǵymen shyn júrekten quttyqtaımyn! Ár januıada qýanysh pen shattyq uıalasyn», - dedi ol.