Majarstanda jyldamdyqty asyrǵandarǵa qatysty jaza kúsheıdi

ASTANA. KAZINFORM — Majarstanda jol qozǵalysy erejelerine jańa ózgerister engizilip, jyldamdyqty asyrǵan júrgizýshilerge qatysty aıyppuldar aıtarlyqtaı ulǵaıdy, dep jazdy Azertadj.

«Indeks» basylymynyń dereginshe, Úkimet sanktsııalardy kúsheıtýdi joldardaǵy apattardyń artýymen jáne júrgizýshilerdiń tártibin jaqsartý qajettiligimen túsindiredi.

Jańartylǵan erejelerge sáıkes, aıyppuldyń mólsheri endi ruqsat etilgen jyldamdyqty qanshalyqty asyra buzǵanǵa baılanysty bolady. Endi aıyppul burynǵydan qymbat bolady, al jyldamdyqty aıtarlyqtaı asyrǵan júrgizýshilerge salynatyn aıyppul birneshe esege artyp otyr. Keıbir jaǵdaılarda júrgizýshi kýáligin ýaqytsha alyp qoıý da qarastyrylǵan.

Qala men eldi mekenderde jol erejesin buzǵandarǵa erekshe kóńil aýdarylmaq. Sebebi adam kóp shoǵyrlanǵan shaharlarda jol erejesine qatysty quqyq buzýshylyq qaýipti dep sanalady. Bılik ókilderi atap ótkendeı, aýyr zardap ákelgen jol apattarynyń basym bóligi qala men aýyldarda tirkeledi.

Majarstan polıtsııasy quqyq buzýshylyqtardy tirkeý kameralaryn jáne mobıldi patrýlderdi belsendi qoldanýǵa daıyn ekenin málimdedi. Іshki ister mınıstrliginiń ókilderi aıtqandaı, ózgeristerdiń maqsaty — aıyppuldar arqyly bıýdjetti tolyqtyrý emes, apattardyń sanyn azaıtý jáne adamdardyń ómirin saqtaý.

Jergilikti sarapshylar bul sharalardyń birneshe eýropa elderinde tıimdiligin kórsetkenin atap ótedi. Alaıda, júrgizýshiler jańa erejelerge qanshalyqty tez beıimdeletini jáne bılik oryndary joldaǵy apattardyń aıtarlyqtaı tómendeýine qol jetkize ala ma degen suraq áli ashyq kúıde qalyp otyr.

Aıta keteıik, Majarstan pasporty álemdegi eń myqty 7 qujattyń qataryna kirdi.