Majarstanda jemis tapshylyǵy: baǵa ósip, ımport artýy múmkin

ASTANA. KAZINFORM — Bıyl Majarstanda jemis-jıdek daqyldarynyń túsimi kúrt tómendep, bul baǵanyń ósýi men eksport kóleminiń azaıýyna sebep boldy, dep habarlaıdy AZERTADJ.

Eldegi baǵbandar qaýymdastyǵynyń málimetinshe, kóktemdegi úsik, qýańshylyq jáne temperatýranyń kúrt ózgerýi órik, shabdaly jáne alma ónimderine eleýli zııan keltirgen. Jekelegen aımaqtarda jemis shyǵyny ádettegi túsimniń 60-80 paıyzyna jetken.

Qaýymdastyq usynǵan esepke sáıkes, ásirese ortalyq jáne soltústik-shyǵys óńirler qatty zardap shekken. Bul aımaqtardaǵy kóptegen baqtardy sáýir aıynda úsik shalǵan. Jaz mezgili de erekshe ystyq ári qurǵaq bolyp, jaǵdaıdy odan ári qıyndatty. Aýyl sharýashylyǵy mamandarynyń sózinshe, ylǵal jetispegendikten kóptegen aǵash jemisin túıin bere bastaǵanda, erte kezeńde-aq tastaǵan.

Majarstan Aýyl sharýashylyǵy mınıstrligi fermerlerge qoldaý kórsetip, shyǵynnyń bir bóligin óteý múmkindigin jarııalady. Alaıda sarapshylar bul barlyq máseleni sheshpeıdi dep eskertip jatyr, sebebi aýa raıynyń kúrt ózgeristeri jıilep barady.

Majarstan dástúrli túrde Eýropalyq Odaq elderine kóp mólsherde jemis eksporttaıtyn, alaıda bıyl jetkizý kólemi edáýir qysqarýy múmkin. Jergilikti naryqtarda baǵa ósip, kórshiles elderden ımport artýy múmkin. Sarapshylar tutynýshylarǵa kúzge qaraı tosap, shyryn jáne jańa pisken jemisterdiń qymbattaýyna daıyn bolýǵa keńes beredi.

Budan buryn Majarstan Eýropadaǵy eń tynysh ári qaýipsiz týrıstik baǵyttardyń biri retindegi bedelin taǵy bir márte rastaǵanyn jazǵanbyz. Týrızm salasy mamandarynyń baǵalaýynsha, bul elde qylmys deńgeıi tómen ári sheteldik qonaqtar úshin jaıly.