Majarstanda «Turan» túrki halyqtarynyń dúnıejúzilik quryltaıy bastaldy
Majarstannyń halyqtyq jıynynyń vıtse-spıkeri Shandor Lejak Túrki quryltaıyna kelgen qazaqstandyq delegatsııa - QR Mádenıet jáne sport mınıstrliginiń jaýapty hatshysy Qýatjan Ýálıev, halyqaralyq Túrki akademııasynyń prezıdenti Darhan Qydyráli jáne «QazAqparat» HAA bas dırektory Asqar Ýmarovpen kezdesti.
Vıtse-spıker Shandor Lejak «Turan» quryltaıy halyqtardy biriktirip, mádenı-gýmanıtarlyq baılanys ornatýǵa múmkindik beretin mańyzdy shara ekendigin atap ótti.
Parlamenttegi kezdesýde Majarstandaǵy «Madııar Turan» qorynyń jetekshisi, majarlyq antropolog Andrash Bıro quryltaıdyń tarıhyna toqtala otyryp, aýqymdy sharanyń uıymdastyrylyp kele jatqanyna bıyl 10 jyl tolǵanyn eske sala ketti. Ol quryltaıdy uıymdastyrýdaǵy Qazaqstannyń qosqan úlesin sóz etti.
Kezdesýden soń 30-dan astam túrki elderi ókilderiniń qatysýymen ótken Majarstan parlamentindegi keńeıtilgen jıynda Shandor Lejak pen Andrash Bıro sóz sóılep, «Turan» halyqtarynyń festıvalin ashyq dep jarııalady. Sondaı-aq, ol túrki halyqtarynyń basyn qosatyn quryltaıdyń bolashaǵyna qatysty máselelerdi de sóz etti.
Aıta ketý kerek, «Turan» halyqaralyq quryltaıy eki jylda bir ret ótkiziledi. Oǵan búkil Eýropa elderinen 300 myńnan astam týrıst jınalady.
Eske sala ketsek, quryltaıǵa qatysýshylar Majarstan astanasyndaǵy Abaı Qunanbaevtyń eskertkishine gúl shoqtaryn qoıdy.
