Majarstanda sheteldik avtokólik júrgizýshilerine janarmaı naryqtyq baǵamen satylady

BRıÝSSELЬ. QazAqparat – Eýroodaqtyń energetıka naryǵynda qalyptasqan kúrdeli jaǵdaıǵa baılanysty Majarstan bıligi shetel azamattaryna janar-jaǵarmaı satý kezinde baǵany kóterý sharasyn engizdi, dep habarlaıdy QazAqparat menshikti tilshisi hirado.hu saıtyna silteme jasap.

Jergilikti BAQ Majarstan úkimetiniń keńse basshysy Gergeı Gýlıashtyń beısenbi kúni mınıstrler kabınetiniń otyrysynda el ekonomıkasyn qorǵaýǵa shaqyrǵanyn habarlady. Ol bıylǵy 27 mamyrdan bastap jeńildetilgen baǵamen tek majarstandyq tirkeý nómirleri bar kólikterge janarmaı quıýǵa bolatynyn málim etti.

Osylaısha, Majarstan úkimeti baǵany 480 forınt (lıtrine shamamen 560 teńge) kóleminde ustap tursa, Eýropada ortasha baǵa 700-900 forıntti (lıtrine 800-1000 teńge) quraıdy.

Jumadan bastap tek majarstandyq tirkeý nómirleri bar avtokólikterge janarmaıdy 480 forınt baǵasymen toltyrýǵa bolady; al sheteldikter janarmaıdy naryqtyq baǵamen quıady.

Sonymen qatar, el úkimeti Ýkraınadaǵy jaǵdaıǵa baılanysty gýmanıtarlyq apat qaýpi bar dep sanaıdy, onyń ekonomıkalyq saldary aýyr bolýy múmkin.