Majarstanda Kókpar jáne ulttyq sport túrleri qaýymdastyǵy quryldy
«Majar-Turan» qorynyń qoldaýymen qurylǵan qaýymdastyq dástúrli sport túrlerin júıege keltirip, buqaralyq sıpat berýdi maqsat tutady. Sonymen qatar ulttyq sport túrlerimen aınalysatyn birlestikter men federatsııalardyń jumysyn kásibı deńgeıge kóterip, olardyń arasynda áriptestik baılanys ornatý kózdelgen.
Majarstandaǵy Kókpar jáne ulttyq sport túrleri qaýymdastyǵynyń ókili Zoltan Varganyń aıtýynsha, qaýymdastyq ulttyq sporttan saıystar, halyqaralyq týrnır men Álem chempıonattaryn uıymdastyryp, túrki halyqtary sportyna álem elderiniń qyzyǵýshylyǵyn arttyrýǵa septigin tıgizbek. Sonymen qatar ol ulttyq sport túrleri arasynda kókpardyń mańyzdy ekenin erekshe atap ótti.
«Bul – Ortalyq Azııanyń barlyq derlik elderinde erekshe orny bar jáne HH ǵasyrdyń ortasyna deıin Majarstanda da oınalyp kelgen kóshpendiler oıyny» – deıdi ol.
Qaýymdastyq quramyna 12 sport túri boıynsha birlestik enip otyr. Onyń ishinde búrkitshi, kókpar, at ústinen sadaq atý, naızalasý, kúres, saýytty áskerdiń (qarýly) jekpe jegi boıynsha sport birlestikteri bar.
Búginde ulttyq sportqa degen qyzyǵýshylyq artyp keledi. Óıtkeni, etnosport – ár ulttyń ózindik ereksheligin, dástúri men mádenıetin kórsetetin qural.
«Álemde júrip jatqan saıası, ekonomıkalyq, ekologııalyq jáne mádenı protsester aıasynda, kóshpendi halyqtyń qundylyǵy, murasy men dástúrine júginip, tegimizdi tanyp, bilýdiń mańyzy zor», – deıdi uıymdastyrýshylar.
Atap óteıik, qaýymdastyq bıyl Majarstandaǵy «Sadaqshylar joly» mektebimen birlesip, kóshpendi halyqtardyń ulttyq sport túrlerine arnalǵan halyqaralyq chempıonat uıymdastyrdy. Sportshylar at jarys, jekpe-jek, sadaq atý, semserlesý syndy kóshpendiler oıyndarynyń on túrinen óner kórsetti. Sondaı-aq kelýshiler majarlardyń suńqar ushyrý dástúrin tamashalap, kóshpendiler turmysy taqyrybyndaǵy fotokórme, kıiz úı jabdyqtary men qarý-jaraq túrlerimen tanysty.
Majarstannyń Kókpar jáne ulttyq sport túrleri qaýymdastyǵy Túrkııanyń Búkilálemdik etnosport konfederatsııasymen áriptestik qatynas ornatyp, qyrkúıek aıynda Eýropa Odaǵynyń jastar kóshbasshylary men jastar arasynda dástúrli sport oıyndary men adamzattyń mádenı murasynyń dástúrlerin nasıhattaý jobasyna qatysty.
