Majarstanda qazaqstandyq aýdarmashynyń eńbegi úzdik dep tanyldy

BÝDAPESh. QazAqparat – Majarstandaǵy halyqaralyq baıqaýda qazaqstandyq aýdarmashy Dáýren Berikqajyulynyń eńbegi úzdik dep tanyldy, dep habarlaıdy QazAqparat Majar-Turan qoryna silteme jasap.

Majar aqyny Petófı Shandordyń týǵanyna 200 jyl tolýyna oraı, aqyn poezııasyn qazaq, ázerbaıjan, qyrǵyz, túrik, túrikmen jáne ózbek tilderine aýdarýda halyqaralyq baıqaý jarııalandy. Baıqaý sharty boıynsha, túrki halyqtarynyń aqyndary Petófı Shandordyń «Mahabbat pen bostandyq» atty óleńi men ózi tańdaǵan bir shyǵarmasynyń aýdarmasyn usynýy tıis.

Halyqaralyq baıqaý laýreattary naýryzdyń 10-20 aralyǵynda Majarstan qalalaryn aralap, sharanyń jabylý saltanatyna qatysty. Olardyń qatarynda Dáýren Berikqajyuly (Qazaqstan), Ramıl Ehmed pen Barysh Javıd Movsýmly (Ázerbaıjan), Tolýk Bek Baızaq (Qyrǵyzstan), Dýrsýn Aıan (Túrkııa), Rýstam Mýsýrmon (Ózbekstan) jáne Aqmurat Rejebov (Túrkimenstan) bar.

Majarstan Parlamentiniń vıtse-spıkeri Lejak Shandor qonaqtardy qarsy alyp, olardy majar halqyna tanystyrý maqsatynda, Parlament ǵımaratynda baspasóz máslıhatyn ótkizdi. Sharada aqyndar óz aýdarmalaryn oqyp, ár elde jaryq kórgen aqynnyń shyǵarmalar jınaqtaryn Petófı ádebı murajaıyna tabys etti. Baspasóz máslıhatynda sóz alǵan qazaq aqyny Dáýren Berikqajyuly, Qadyr Myrza-Áliden keıin Petófı shyǵarmalaryn aýdarý úlken jaýapkershilik ekenin, sonymen qatar majar men qazaq halyqtarynyń rýhanı, mádenı, ádebı murasyndaǵy uqsastyqtarǵa toqtaldy. Shara sońynda Dáýren Berikqajyuly Qadyr Myrza-Áliniń «Mahabbat pen bostandyq» (aýdarma) kitabyn uıymdastyrýshylarǵa tabys etti.

Uıymdastyrýshylardyń aıtýynsha, aýdarylǵan shyǵarmalar aldaǵy ýaqytta jınaq bolyp shyǵarylady. Aıta keteıik, ár jeńimpazǵa 2 myń dollar kóleminde qarjylaı syıaqy beriledi.