Majarstanda qazaq tilin úırenip júrgender sany ósip keledi

NUR-SULTAN. QazAqparat – Qazirgi tańda Majarstanda Qazaqstannyń myń stýdenti bilim alyp jatyr. Bul týraly QR Premer-Mınıstriniń orynbasary – Syrtqy ister mınıstri Muhtar Tileýberdi málim etti, dep habarlaıdy QazAqparat tilshisi.

«Ekijaqty yntymaqtastyqtyń mańyzdy elementteriniń biri bilim salasy bolyp sanalady. Qazaqstan azamattaryna jyl saıyn 250 grant bóletini úshin Majarstanǵa alǵysymyzdy bildiremiz. Qazirgi tańda Majarstanda bizdiń myń stýdentimiz bilim alýda. Majar tilinde bilim alýǵa qyzyǵýshylyq tanytatyn stýdentterdiń sany artyp keledi. Majar joǵary oqý oryndarynda qazaq tilin úırenip júrgen majar stýdentterine de rızamyz. Bul jastardyń keleshekte elderimizdi baılanystyratyn «jandy kópirge» aınalatynyna kúmán joq», - dedi M. Tileýberdi.

Mınıstr Qazaqstan-Majar qarym-qatynastarynyń aýqymy búgin talqylanǵan máselelermen ǵana shektelmeıtinine senim artty.

«Ótkizgen kelissózderimiz ózara tıimdi yntymaqtastyqty odan ári damytýǵa keń óris ashady. Majarstannyń Syrtqy ekonomıkalyq baılanystar jáne syrtqy ister mınıstri Peter Sııarto myrzanyń resmı sapary ekijaqty, kópjaqty formatta Nur-Sultan men Býdapesht arasyndaǵy strategııalyq áriptestik qarym-qatynastardy nyǵaıtýǵa qosymsha serpin beredi dep úmittenemin», - dedi Muhtar Tileýberdi.

Budan buryn habarlanǵandaı, búgingi kelessiózderden keıin taraptar eki el arasyndaǵy birneshe qujatqa qol qoıdy.

Aıta keteıik, Ortalyq Azııa óńirinde majar kompanııalarynyń múmkindikteri keńeıtilmek.