Majarstanda qaterli isikti erte anyqtaýǵa arnalǵan tegin baǵdarlama bastaldy
ASTANA. KAZINFORM — Majarstanda onkologııalyq aýrýlardy erte anyqtaýǵa baǵyttalǵan tegin memlekettik baǵdarlama iske qosyldy, dep habarlaıdy AZERTADJ jergilikti BAQ-qa silteme jasap.
2025 jylǵy qyrkúıekten bastap Majarstanda eresek turǵyndar arasynda onkologııalyq aýrýlardy erte kezeńde anyqtaýǵa baǵyttalǵan jańa profılaktıkalyq tekserýler baǵdarlamasy qoldanyla bastady. Bul bastamany Densaýlyq saqtaý mınıstrligi júzege asyryp otyr jáne ol tolyqtaı memlekettik bıýdjet esebinen qarjylandyrylady.
Baǵdarlama eki negizgi baǵytty qamtıdy: áıelderge arnalǵan mammografııalyq jáne gınekologııalyq tekserýler, sondaı-aq erlerge arnalǵan asqazan-ishek joldary aýrýlaryna, sonyń ishinde toq ishek obyryna (kolorektaldy rak) arnalǵan skrınıng. Tekserýlerden ótý erikti túrde júrgiziledi, alaıda memleket tarapynan belsendi qoldaý kórsetiledi — azamattarǵa jeke shaqyrtýlar poshta nemese elektrondy densaýlyq saqtaý júıesi arqyly jiberiledi.
Medıtsınalyq tekserýler memlekettik emhanalarda jáne shalǵaı óńirlerge baratyn mobıldi dıagnostıkalyq ortalyqtarda júrgiziledi. Barlyq protsedýra, onyń ishinde qajetti taldaýlar men mamandar keńesteri tolyǵymen tegin.
Densaýlyq saqtaý mınıstrliginiń ókilderiniń aıtýynsha, baǵdarlamanyń basty maqsaty — qaterli isikterden bolatyn ólim-jitimdi azaıtý, aýrýdy klınıkalyq kezeńge deıin anyqtap, ýaqytyly emdeýdi bastaý. Bılik bul tekserýler azamattardyń densaýlyǵyna jaýapkershilikpen qaraý mádenıetiniń bir bóligine aınalady dep úmittenip otyr.
Baǵdarlama 2026 jyldyń sońyna deıin pılottyq rejımde júzege asyrylady, sodan keıin ony halyqtyń basqa toptaryna da keńeıtý josparda bar.
Budan buryn Majarstanda bilim berý eki tilde júrgiziletin mektepterdiń sany turaqty túrde ósip keletinin jazǵanbyz.