Majarstanda bılik aýysýy múmkin: «Tısa» partııasy kósh bastap tur
ASTANA.KAZINFORM - Majarstandaǵy parlament saılaýynda oppozıtsııalyq «Tısa» partııasy alda keledi, al premer-mınıstr Vıktor Orban jeńilisin moıyndady, dep habarlaıdy Euronews.
Aldyn ala nátıjeler boıynsha, Majarstandaǵy parlamenttik saılaýda proeýropalyq jáne ońshyl-tsentrıstik «Tısa» partııasy, onyń kóshbasshysy Peter Madıar jetekshilik etýde.
Majarstannyń Ulttyq saılaý keńsesiniń málimetinshe, bıýlletenderdiń 53,45%-y óńdelgennen keıin «Tısa» 199 orynnyń 136-syn ıelenip otyr.
Parlamenttegi úshten eki kópshilik partııaǵa Konstıtýtsııa men negizgi zańdarǵa ózgerister engizýge múmkindik beredi.
Premer-mınıstr Vıktor Orban basqaratyn konservatıvtik «Fıdes» partııasy ázirge nebári 56 oryn alyp otyr. Taǵy jeti mandat ýltraońshyl «Bizdiń Otan» partııasyna buıyrýy múmkin.
Daýystardy sanaý jalǵasqandyqtan, saılaý nátıjeleri áli ózgerýi yqtımal.
Sonymen qatar Peter Madıar Vıktor Orban ony jeńisimen quttyqtaǵanyn málimdedi.
— Saılaý nátıjeleri áli túpkilikti bolmasa da, jalpy kórinis aıqyn. Eldi basqarý jaýapkershiligi men múmkindigi bizge buıyrmady. Jeńiske jetken partııany quttyqtaımyn, — dedi Vıktor Orban óz jaqtastary aldynda sóılegen sózinde.
Ol sondaı-aq onyń «Fıdes» partııasy oppozıtsııada bola otyryp, Vengrııaǵa qyzmet etetinin aıtty.
Bul jolǵy saılaýda saılaýshylar belsendiligi rekord jańartty — 74,23% boldy. 2022 jylǵy saılaýda bul kórsetkish 62,92% bolǵan, al buǵan deıingi eń joǵary kórsetkish 2002 jyly 73,51% deńgeıinde tirkelgen.
Majarstan zańdaryna sáıkes, daýystardy tolyq sanaý 18 sáýir, senbige deıin aıaqtalýy tıis.
