Majarstanda bıylǵy jaz 125 jyldaǵy eń qurǵaq boldy
ASTANA. KAZINFORM — Bıylǵy jaz Majarstanda 1901 jyly turaqty meteorologııalyq baqylaý bastalǵaly beri tirkelgen eń qurǵaq maýsym boldy. Bul týraly Kazinform agenttiginiń Eýropalyq Odaqtaǵy menshikti tilshisi habarlaıdy.
Aldyn ala málimet boıynsha, Majarstanda bıylǵy jazda jaýyn-shashyn mólsheri nebári 74,1 mıllımetrdi qurady. Bul 1991-2020 jyldardaǵy klımattyq normanyń 36 paıyzyna ǵana sáıkes keledi. Buǵan deıingi eń tómen kórsetkish 1952 jyly tirkelip, sol jyly jaýyn-shashyn mólsheri 101,3 mıllımetr bolǵan.
Osylaısha 2026 jyldyń jazy sońǵy 125 jyldaǵy eń qurǵaq maýsymnan shamamen 30 mıllımetrge qurǵaq boldy. Majarstan aýmaǵynyń 60 paıyzǵa jýyǵynda jaýyn-shashynnyń rekordtyq az mólsheri tirkeldi.
Shilde men tamyz aılarynda jaýyn-shashyn mólsheri aıtarlyqtaı azaıyp, qalypty deńgeıden 74 paıyz tómen boldy. 1901 jyldan bergi baqylaý derekterinde shilde eń qurǵaq besinshi, al tamyz tórtinshi orynǵa shyqty.
2026 jyldyń jazy meteorologııalyq baqylaý tarıhyndaǵy eń jyly ekinshi maýsym retinde tirkeldi. Jazdaǵy ortasha temperatýra 23,43 gradýsqa jetip, klımattyq normadan 2,59 gradýsqa joǵary shyqty. Buǵan deıingi rekord 2024 jyly jańaryp, sol kezdegi ortasha temperatýra 23,58 gradýsqa jetken edi. Al 2026 jylǵy tamyz baqylaý tarıhyndaǵy eń jyly aı atandy. Onyń ortasha temperatýrasy 24,9 gradýs boldy.
Sondaı-aq 30 maýsymda Sechen eldi mekeninde Majarstannyń absolıýttik temperatýra rekordy jańaryp, aýa temperatýrasy 42,0 gradýs Tselsııge jetti.
Sozylmaly qurǵaqshylyq saldarynan Dýnaı men basqa sý aıdyndaryndaǵy sý deńgeıi rekordtyq tómen kórsetkishke tústi. Bul Paksh atom elektr stantsııasynyń jumysyna áser etip, eldiń aýyl sharýashylyǵyna aıtarlyqtaı zııan tıgizdi.
Buǵan deıin BUU aptap ystyq pen tabıǵı apattar kúsheıýi múmkin ekenin eskertkenin habarlaǵan bolatynbyz.
Aqzat Jıenalına
