Majarstanda aýa temperatýrasy rekordtyq deńgeıge jetti
ASTANA. KAZINFORM — Majarstanda aýa temperatýrasynyń jańa rekordy tirkeldi. Býdapeshtte termometr baǵany 40 gradýsqa deıin kóterildi. Bul týraly eldiń HungaroMet meteorologııalyq qyzmeti habarlady, dep jazady Report.
Vedomstvonyń málimetinshe, buǵan deıin rekord 1935 jyly tirkelgen edi. Ol kezde aýa temperatýrasy 39,9 gradýsqa jetken bolatyn. Bılik ókilderi aptanyń basynda kúnniń ystyǵy 42 gradýsqa deıin kóterilýi múmkin ekenin eskertip otyr. Eger bul boljam rastalsa, eldiń meteobaqylaý tarıhyndaǵy absolıýttik temperatýralyq rekord jańarady.
Aptap ystyqqa baılanysty HungaroMet aýa raıy qaýpiniń eń joǵary — úshinshi deńgeıin jarııalady. Úkimet memlekettik mekemeler men kompanııalarǵa qyzmetkerlerdi qashyqtan jumys isteý tártibine kóshirýdi usyndy. Al jumys oryndarynda bolýy mindetti qyzmetkerler úshin ǵımarattardy kondıtsıonermen jabdyqtap, aýyz sýmen qamtamasyz etý tapsyryldy.
Sonymen qatar áskerı qyzmetkerler, jergilikti bılik pen qaıyrymdylyq uıymdary qoǵamdyq oryndarda turǵyndarǵa aýyz sý taratyp jatyr.
Aptap ystyq saldarynan jedel járdem shaqyrý sany 8 paıyzǵa artqan. Birneshe adam kún ótip, aýrýhanaǵa jetkizildi. Degenmen elde ázirge iri tótenshe oqıǵalar tirkelgen joq.
Eske salaıyq, Frantsııada birneshe kúnge sozylǵan aptap ystyq saldarynan ólim-jitim kórsetkishi boljanǵan deńgeıden shamamen myń jaǵdaıǵa artty.
