Majarstanda almanyń baǵasy kelisine 2,15 eýroǵa deıin qymbattady

ASTANA. KAZINFORM — Majarstanda jemis-jıdek naryǵynda baǵa kúrt qymbattap jatyr. 2025 jyldyń tamyz aıyndaǵy málimet boıynsha, bir keli almanyń ortasha baǵasy 859 forıntqa, ıaǵnı 2,15 eýroǵa jetken, dep habarlaıdy AZERTADJ.

Bul – eki jyl burynǵy baǵamen salystyrǵanda shamamen 60%-ǵa qymbat, ári tarıhtaǵy eń joǵarǵy kórsetkish. Atalǵan ósim tutynýshylardyń qaltasyna aıtarlyqtaı salmaq túsirip otyr.

Salalyq basylymdar men mamandandyrylǵan qaýymdastyqtardyń málimetinshe, baǵanyń kúrt qymbattaýyna basty sebep — almanyń az jınalýy.

Bıyl elde bar bolǵany 160 myń tonna alma jınalady dep kútiledi, onyń tek jartysy ǵana balǵyn kúıinde satýǵa jaramdy. Qalǵan bóligi shyryn men jemis ezbesin óndirý úshin qaıta óńdeýge jiberiledi.

Aýa raıynyń qolaısyzdyǵy jaǵdaıdy odan ári ýshyqtyrdy: kóktemgi úsikter, mamyr aıyndaǵy salqyn aýa raıy jáne jazǵy qurǵaqshylyq jemis aǵashtaryna eleýli zııan keltirdi.

Sonymen qatar, sońǵy jıyrma jyl ishinde Majarstandaǵy alma baǵynyń aýmaǵy eki ese azaıyp, 20 myń gektarǵa deıin qysqarǵan.

Jergilikti ónimniń tapshylyǵy Majarstandy Polsha, Aýstrııa jáne basqa da EO elderinen alma ımportyn arttyrýǵa májbúrlep otyr.

Sarapshylar qazirgi úrdis saqtalatyn bolsa, baǵanyń arzandaýyn kútýge negiz joq ekenin eskertedi. Osyǵan baılanysty majarlar almanyń ornyna banan, almurt jáne tsıtrýs sekildi basqa jemisterdi jıi tańdaı bastady.

Osydan buryn Majarstan Aýyl sharýashylyǵy mınıstrligi fermerlerge qoldaý kórsetip, shyǵynnyń bir bóligin óteý múmkindigin jarııalaǵan edi.