Majarstan úkimeti sýarmaly sýdyń shyǵynyn sýbsıdııalaıdy

ASTANA. KAZINFORM — Majarstan úkimeti fermerlerge sýarmaly sýdy tegin berý arqyly onyń qunyn óz moınyna almaqshy, dep habarlaıdy AZERTADJ.

Eldiń aýyl sharýashylyǵy mınıstri Ishtvan Nadtiń aıtýynsha, bul maqsatqa 10 mıllıard forınt bólinedi.

Qýańshylyq saldarymen kúreske daıyndyq aıasynda úkimet qosymsha 4,7 mıllıard forıntti ınfraqurylymdy jóndeýge — kanaldar, sý qaqpalary men sorǵylardy qalpyna keltirýge baǵyttaıdy.

Mınıstrdiń aıtýynsha, bıyl Eýropa qatty qýańshylyqqa tap boldy: Tısa men Dýnaı ózenderindegi sý deńgeıi qalypty mólsherden edáýir tómen, al jazdyń sońyna boljanǵan aýa raıy — aımaqtaǵy eń ystyq kezeńderdiń biri bolmaq.

Qazirgi kezde jazdyq dándi daqyldar men kúnbaǵys ónimderi jaqsy bolsa da, júgeri ylǵal tapshylyǵynan zardap shekti. Aýyl sharýashylyǵy salasynyń turaqtylyǵyn saqtaý úshin jaýyn-shashyn óte qajet.

Statıstıkaǵa sáıkes, sońǵy úsh jylda Majarstanda sýarmaly jer kólemi eki ese artyp, 150 myń gektarǵa jetken.

Sonymen qatar, fermerlerge aýyl sharýashylyǵy ınfraqurylymyn jańǵyrtý úshin 176 mıllıard forınt bólingen. Quny 65 mıllıard forınt bolatyn tender áli de ashyq kúıinde tur.

Osydan buryn bıyl Majarstanda jemis-jıdek daqyldarynyń túsimi kúrt tómendep, bul baǵanyń ósýi men eksport kóleminiń azaıýyna sebep boldy.