Majarstan úkimeti qazaqstandyqtarǵa oqý grantyn bóldi

ASTANA. QazAqparat - Majarstan qazaqstandyqtarǵa «Stipendium Hungaricum» stıpendııalyq baǵdarlamasy aıasynda 250 bilim berý grantyn usyndy. Bul týraly QazAqparat Halyqaralyq baǵdarlamalar ortalyǵyna silteme jasap habarlaıdy.

Majarstanda tegin oqý konkýrsyna qatysý úshin qujat qabyldaý bıylǵy jylǵy 12 jeltoqsanda bastalyp, 2023 jylǵy 18 qańtarǵa deıin jalǵasady. Ótinimder Egov.kz elektrondy Úkimet portaly arqyly jáne «Halyqaralyq baǵdarlamalar ortalyǵy» AQ-da qabyldanady.

«Bıyl úkimetaralyq kelisimder sheńberinde bólingen granttar boıynsha konkýrstyq irikteýdiń erejeleri jetildirildi. Halyqaralyq baǵdarlamalar ortalyǵynyń bastamasymen konkýrstyq irikteýde aýyldyq jerlerden úmitkerler úshin artyqshylyqtar engizildi. Sonymen birge úkimetaralyq granttardyń túlekteri úshin eńbekpen óteý merzimi úsh jyldan bir jylǵa deıin qysqartyldy», - dedi «Halyqaralyq baǵdarlamalar ortalyǵy» AQ Basqarma tóraǵasy Ánýar Janǵozın.

«Stipendium Hungaricum» stıpendııalyq baǵdarlamasy qazaqstandyqtarǵa kelesi baǵdarlamalar boıynsha 250 grant usynyp otyr:

• bakalavrıat 110 oryn;

• magıstratýra 90 oryn;

• bakalavrıat+magıstratýra 30 oryn;

• doktorantýra 20 oryn.

Grant majar tili kýrstarynan ótý, akademııalyq oqý, jataqhanada turý, medıtsınalyq saqtandyrý shyǵyndaryn óteıdi, sondaı-aq stýdentterge aı saıynǵy stıpendııa tólenedi.

Oqý aǵylshyn jáne majar tilderinde ótedi. Majar tilin bilmeıtin qazaqstandyqtar úshin tegin tildik daıyndyqtan ótý múmkindigi qarastyrylǵan.

Konkýrsqa qatysý úshin negizgi krıterııler:

-Bakalavr dárejesin alýǵa úmitkerler úshin - attestat ortasha balynyń nemese negizgi orta bilimi týraly kýáliktiń jáne aǵymdaǵy oqý jyly boıynsha aǵymdaǵy úlgerimi týraly tabel/transkrıpttiń nemese arnaıy orta bilimi týraly dıplom ortasha ballynyń 5.0-ten 4.0 balyna sáıkestigi;

- Magıstr dárejesin alýǵa úmitkerler úshin – bakalavr/maman/dıplomy nemese aǵymdaǵy úlgerimi týraly taranskrıptiń ortasha ballynyń 4.0-ten 3.0 balyna sáıkestigi;

- Doktor dárejesin alýǵa úmitkerler úshin – magıstr dıplomy nemese aǵymdaǵy úlgerimi týraly tabel/transkrıpttiń ortasha balynyń 4.0-ten 3.0 balyna sáıkestigi;

- Aǵylshyn tilinde oqý úshin keminde IELTS 9.0-dan 5.5, TOEFL 120-dan 46 deńgeıdegi qoldanystaǵy sertıfıkattar bolý tıis.

Foto: resources.gocollette.com