Majarstan úkimeti Qazaqstandaǵy prezıdenttik saılaýǵa qatysty óz ustanymyn bildirdi

NUR-SULTAN. QazAqparat - Majarstan Premer-mınıstriniń orynbasary - Qarjy mınıstri Mıxaı Varga Qazaqstandaǵy prezıdenttik saılaýǵa qatysty pikir bildirdi, dep habarlaıdy QazAqparat tilshisi.

«Majarstan Qazaqstandaǵy basshylyqtyń aýysýyna qurmetpen qaraıdy. Aldaǵy prezıdenttik saılaý da xalyqaralyq jáne ishki saıasattyń turaqtylyǵyn kórsetedi dep bilemiz. Bunyń bári tabysty ekonomıkalyq saıasattyń kórinisi bolsa kerek. Sonyń arqasynda Qazaqstan búginde álem boıynsha 50 iri ekonomıkanyń qataryna kiredi», - dedi M.Varga Qazaqstan-Majarstan bıznes forýmynda.

Onyń aıtýynsha, Majarstanda Qazaqstandy erekshe strategııalyq áriptes dep biledi. Sebebi Qazaq eli arqyly Ortalyq Azııamen tyǵyz saýda-ekonomıkalyq baılanystar júrgiziledi.

«Ótken jyly Qazaqstandaǵy ekonomıkalyq ósim 4,1 paıyzǵa jetti. Bolashaqta atalǵan kórsetkish áli de ósedi degen boljam bar. Al Majarstannyń ekonomıkasy byltyr 4,9 paıyzǵa ósti. Bul Eýropa elderiniń ortasha kórsetkishinen úsh esege artyq. Sondyqtan eki eldiń saýda-ekonomıkalyq baılanystardy damytý salasyndaǵy áleýeti joǵary», - dep atap kórsetti M.Varga.