Majarstan prezıdenti óz qyzmetinen ketýge múmkindik beretin túzetýge qol qoıdy
ASTANA. KAZINFORM — Majarstan prezıdenti Tamash Shýıok premer-mınıstr Peter Madıardyń bıleýshi «Tısa» partııasynyń bastamasymen parlament qabyldaǵan Konstıtýtsııaǵa engizilgen túzetýge qol qoıdy. Bul ózgeris memleket basshysyn qyzmetinen bosatýǵa múmkindik beredi, dep habarlaıdy DW.
Prezıdent Facebook jelisinde jarııalaǵan beıneúndeýinde bul máselege qatysty barlyq quqyqtyq múmkindikterdi muqııat saralap, ar-ojdanyna súıene otyryp, Konstıtýtsııada kózdelgen mindetin oryndaý týraly sheshim qabyldaǵanyn aıtty.
Sonymen qatar Tamash Shýıok parlamenttiń sheshimimen kelispeıtinin bildirdi. Onyń pikirinshe, bul túzetý saıası bılikti asyra paıdalanýdyń uıatty tarıhı mysaldarynyń birine aınalýy múmkin. Sondaı-aq ol mundaı ózgeristen keıin prezıdent ınstıtýty eldegi tepe-teńdik pen tejemelik rólinen aıyrylatynyn málimdedi.
Sóziniń sońynda Shýıok qandaı jaǵdaı bolsa da adamgershilik pen aqıqatqa adal bolýǵa shaqyryp, el azamattaryn birlikti saqtaýǵa úndedi.
Konstıtýtsııaǵa engizilgen daýly túzetý
13 shildede Majarstan parlamenti prezıdentti qyzmetinen bosatýǵa múmkindik beretin Konstıtýtsııaǵa túzetýdi maquldady. Peter Madıar usynǵan bastamany 199 depýtattyń 139-y qoldasa, altaýy qarsy daýys berdi. Burynǵy premer-mınıstr Vıktor Orbannyń «Fıdes» partııasynyń depýtattary daýys berýge qatysqan joq.
Majarstan zańnamasyna sáıkes, prezıdentti qarapaıym parlamenttik daýys berý arqyly qyzmetinen bosatý múmkin emes. Ol úshin Konstıtýtsııaǵa ózgeris engizý qajet. Muny parlamentte úshten eki kópshilikke ıe «Tısa» partııasy júzege asyrdy.
Alaıda quqyq qorǵaýshylar bul sheshimniń qaýipti quqyqtyq tájirıbege aınalýy múmkin ekenin aıtyp otyr. Amnesty International uıymy Tamash Shýıoktyń zań talaptaryna saı ádil rásimge quqyǵy bar ekenin málimdedi. Al Human Rights Watch mundaı áreketterdi «Fıdes» bıligi kezeńindegi saıası tájirıbeni eske salatyn qadam dep baǵalady.
Óz kezeginde premer-mınıstr Peter Madıar halyqtyń demokratııalyq tańdaýyn elemeýge bolmaıtynyn aıtyp, Shýıokqa degen senimniń edáýir tómendegenin jetkizdi. Vengrııadaǵy 21 Research Center ortalyǵynyń mamyr aıynda júrgizgen saýalnamasyna sáıkes, saılaýshylardyń 67 paıyzy prezıdenttiń qyzmetten ketýin qoldaıdy.
Aıta keteıik, sáýir aıynda ótken saılaýdaǵy jeńisinen keıin Majarstannyń jańa premer-mınıstri Peter Madıar memlekettik shyǵyndardy túbegeıli qysqartýǵa kiristi.
