Majarstan Prezıdenti: Álem Qazaqstandy aımaqtaǵy tsıfrlyq derjava retinde tanı bastady
ASTANA. KAZINFORM – Majarstan Prezıdenti Tamash Shýıok Kazinform tilshisine bergen eksklıýzıvti suhbatynda eki el arasyndaǵy strategııalyq áriptestiktiń keleshegi týraly paıymyn aıtty.
— Qazaqstan men Majarstan arasyndaǵy strategııalyq baılanysqa baǵa berseńiz, qaı baǵyttardyń áleýeti tereńdetýge turalyq der edińiz ?
— Bizderge ortaq tarıhı murany eskersek, elderimiz arasyndaǵy qarym-qatynas qazir belsendi damý kezeńin bastan keship jatyr deýge bolady. Byltyr biz strategııalyq seriktestiktiń 10 jyldyǵyn atap óttik. Bul seriktestik tyǵyz saıası baılanystarmen, joǵary deńgeıdegi turaqty saparlarmen, únemi keńeıip kele jatqan ekonomıkalyq yntymaqtastyqpen, tyǵyz mádenı baılanystarmen jáne bilim berý salasyndaǵy ózara baılanystarmen kózge uryp tur.
Basym baǵyttardyń ishinde energetıka, farmatsevtıka jáne aýyl sharýashylyǵyn bólip ataýǵa bolady. Biz tek aımaqta ǵana emes, jahandyq deńgeıde tanylǵan Qazaqstandaǵy tsıfrlandyrý protsesterin úlken qyzyǵýshylyqpen baqylap otyrmyz. Dál osy salalar, bizdiń oıymyzsha, aldaǵy jyldary ekijaqty ózara is-qımyldy tereńdete túsetin túri bar.
- Qazaqstan men Majarstan Eýropa men Ortalyq Azııa arasyndaǵy baılanysty damytýda mańyzdy ról atqarady. Osy turǵyda kólik, logıstıka, energetıka tizbekteriniń róline qandaı baǵa berer edińiz?
- Biz Eýropalyq Odaqqa múshe memleket retinde, ásirese Ortalyq Eýropa eli retinde Qazaqstanmen qarym-qatynasty damytýǵa strategııalyq mán beremiz. Qazirgi daǵdarystar jaǵdaıynda Shyǵys pen Batys arasyndaǵy yntymaqtastyqtyń, saýdany damytýdyń, energııa kózderin ártaraptandyrýdyń jáne senimdi halyqaralyq kólik marshrýttaryn qurýdyń mańyzdylyǵy artyp keledi. Osy baǵyttardyń bárinde Qazaqstan sheshýshi ról atqarady.
Qazaqstan aýmaǵy arqyly ótetin Transkaspıı halyqaralyq kólik dálizi aıtarlyqtaı jetistik bolyp esepteledi. Majarstan men Qazaqstannyń aldynda Eýropa men Azııa arasyndaǵy kópir jáne qaqpa retinde qyzmet etýdiń múmkindikteri tur.
- Eki aradaǵy uzaq merzimdi áriptestikti nyǵaıtýda gýmanıtarlyq baılanystardyń róli qandaı dep oılaısyz?
- Túrkilik tamyr qazaq jáne madııar halqynyń arasyndaǵy baılanystardy odan ári nyǵaıtýǵa berik ári senimdi negiz bolyp otyr.
Stipendium Hungaricum baǵdarlamasy aıasynda jyl saıyn Qazaqstan azamattaryna 250 grant usynamyz. Ondaǵy bir orynǵa 6 adam talasady. Biz qazaqstandyq stýdentterdiń bizde bilim alýǵa degen qyzyǵýshylyǵyn qoldaımyz jáne birqatar vengrııalyq ýnıversıtettiń qazaqstandyq joǵary oqý oryndarymen yntymaqtastyqty belsendi damytyp jatqanyna qýanyshtymyz.
Bizdiń týrızm salasyndaǵy baılanystarymyz Býdapesht pen Shymkent arasyndaǵy tikeleı áýe qatynasynyń arqasynda nyǵaıyp keledi. Bul eki halyqtyń jaqyndasýyna yqpal etedi. Іskerlik jáne týrıstik saparlar men jańa tabystardyń artýy barlyq deńgeıdegi qazaq-madııar baılanysy ortaq tamyrǵa negizdelgen baýyrlastyqty nyǵaıta túsedi.
Buǵan deıin Majarstannyń OTP Bank-i Qazaqstannyń qarjy naryǵyna kiretinin jazǵan edik.