Majarstan premer-mınıstri Qyrǵyzstanǵa resmı saparmen barady
ASTANA. KAZINFORM – 5 qarashada Majarstan premer-mınıstri Vıktor Orban Qyrǵyzstanǵa resmı saparmen barady. Bul týraly Qyrǵyz Respýblıkasy Prezıdenti Ákimshiliginiń syrtqy saıasat bóliminiń meńgerýshisi Muratbek Azymbakıev málim etti, dep habarlaıdy Kazinform menshikti tilshisi.
Onyń aıtýynsha, aldaǵy sapar aıasynda Qyrǵyzstan men Majarstan arasynda joǵary deńgeıdegi kelissózder josparlanǵan. Sondaı-aq taraptar qyrǵyz-manjar strategııalyq seriktestiginiń keń aýqymdy máselelerin talqylaıdy.
«Sapar qorytyndysy boıynsha qyrǵyz-majar ekijaqty yntymaqtastyǵyn odan ári damytý jáne nyǵaıtýǵa baǵyttalǵan birqatar qujatqa qol qoıý josparlanyp otyr. Sonymen qatar 6 qarashada Majarstan Premer-Mınıstri Vıktor Orban Túrki memleketteri uıymyna múshe memleketter basshylary keńesiniń otyrysyna qatysady», - dedi M.Azymbakıev.
Buǵan deıin 5 qarashada Túrkııa prezıdenti Rejep Taııp Erdoǵan Qyrǵyzstanǵa memlekettik saparmen baratynyn jazǵan bolatynbyz.
