Majarstan Qazaqstanmen energetıkalyq yntymaqtastyqty keńeıtýdi kózdeıdi — Peter Sıııarto

ASTANA. KAZINFORM — Majarstannyń Syrtqy ister mınıstri Peter Sıııarto Silk Way telearnasyna bergen eksklıýzıvti suhbatynda Túrki memleketteri uıymy (TMU) aıasyndaǵy óz eliniń basym baǵyttary týraly aıtyp, Qazaqstanmen energetıkalyq yntymaqtastyq salasyndaǵy progresti joǵary baǵalady. 

Silk Way telearnasynyń tilshisi Aınur Imanǵalı Vengrııanyń Túrki memleketteri uıymyna baqylaýshy mártebesine ıe bola otyryp, uıymnyń ekonomıkalyq kún tártibindegi bolashaq róline qatysty suraq qoıdy. Sonymen qatar tilshi Qazaqstan men Majarstan arasyndaǵy joǵary deńgeıdegi sońǵy kezdesýler men birlesken energetıkalyq jobalar aıasyndaǵy yntymaqtastyq týraly surady.

Mınıstr jaýabynda Majarstannyń Qazaqstanmen strategııalyq áriptestigi alǵys aıtyp, qurmet tanytty.

— Biz sizderdiń Prezıdentti erekshe qurmetteımiz jáne ekijaqty qatynasty turaqty túrde jaqsartý jolyndaǵy kúsh-jigerin joǵary baǵalaımyz. Kóp jyldyq daıyndyq pen júzdegen mıllıon dollar kólemindegi ınvestıtsııadan keıin, búginde burǵylaý uńǵymalary iske qosylyp, «Rojkovskoe» ken ornynda gaz óndirý júrgizilip jatqany — tarıhı oqıǵa dep esepteımin, — dedi ol.

Peter Sıııartonyń aıtýynsha, qazir qosymsha ınvestıtsııa tartýǵa múmkindik beretin jańa baǵyttar qarastyrylyp jatyr.

— Biz energetıka salasy boıynsha tyǵyz strategııalyq áriptestikke daıynbyz. Túrki memleketteri uıymyna múshe memleketterge Majarstanǵa baqylaýshy retinde birlesken jumysqa qatysýǵa múmkindik bergenderi úshin alǵys bildiremiz. Biz uıymnyń tabysty qyzmetine úlesimizdi qostyq jáne bolashaqta da osy baǵytta jumys isteı beremiz, — dep tolyqtyrdy mınıstr.

Buǵan deıin Kazinform agenttigi Peter Sıııartonyń Qazaqstanǵa jasaǵan sapary barysynda jazyp alynǵan eksklıýzıvti suhbatyn jarııalaǵan bolatyn.

Búgin Prezıdent Qasym-Jomart Toqaev Túrki memleketteri uıymynyń beıresmı sammıtine qatysty. 

Aıta keteıik, Túrki memleketteri uıymynyń beıresmı sammıtinde birqatar qujat qabyldandy.