Majarstan Qazaqstan stýdentteri úshin bilim granty sanyn kóbeıtti
ASTANA. QazAqparat - Majarstanda oqyǵysy keletin elimizdiń stýdentteri úshin aldaǵy jyly 250 bilim berý granty bólindi, dep habarlaıdy QazAqparat tilshisi.
«Eki el arasyndaǵy dostyq qarym-qatynas jyl sanap artyp keledi, bul qýantarlyq jaǵdaı. Osy turǵyda bizderdi baılanystyratyn yntymaqtastyq salalardyń biri ol - bilim. Ótken jyly Majarstanda oqyǵysy keletin qazaqstandyq stýdentter úshin bilim grantynyń sany 40 bolǵan, bıyl onyń sany 200-ge jetti. Aldaǵy jyly Stipendium Hungaricum baǵdarlamasy aıasynda Majarstanda oqımyn deýshi stýdentter úshin 250 bilim berý granty bólindi», - dedi Majarstannyń elimizdegi Tótenshe jáne ókiletti elshisi Andrash Baranı OKQ-de ótken baspasóz máslıhatynda.
Onyń aıtýynsha, majar eliniń granttar sanyn kóbeıtýine sebep, bıyl bólingen 200 bilim berý grantyna 1 myńnan astam otandasymyz ótinim bildirgen. Majarstanǵa aldaǵy oqý jylyna grantqa úmitkerlerdiń ótinimi 2019 jyldyń 15 qańtaryna deıin qabyldanady.
Sondaı-aq, elshi ústimizdegi jyldyń tamyz aıynda Majarstanda «Turan» túrki halyqtarynyń dúnıejúzilik quryltaıy ótkenin aıta kele, onda quryltaıdy uıymdastyrýdaǵy Qazaqstannyń qosqan úlesi úshin alǵysyn bildirdi.
Sonymen qatar, elshi myrza eki el arasyndaǵy taýar aınalymynyń ústimizdegi jyldyń 9 aıynda ótken jylmen salystyrǵanda (2017 jyly 350 mln AQSh dollary) 22% artyp, jyl sońyna deıin 700 mln AQSh dollaryna jetetinin aıtyp ótti.
Odan bólek, A.Baranıdyń aıtýynsha Qazaqstan naryǵyndaǵy Majarstannyń Wizz Air áýekompanııasy nátıjeli jumys isteýde, atalǵan áýe kompanııasynyń qyzmetin bir jyldyń ishinde 40 myńnan astam jolaýshy paıdalanǵan jáne ushý reısi 98% kestege sáıkes qyzmet kórsetken.
