Majarstan EO-dan suraǵan 16,4 mlrd eýrodan bas tartty
ASTANA. KAZINFORM – Majarstannyń jańa úkimeti Eýropalyq odaqtan qorǵanys salasyna suraǵan nesıeniń kólemin 16,4 mlrd eýrodan 5,4 mlrd eýroǵa deıin qysqartty. Bul týraly Eýrokomıssııa ókili Tomas Rene málimdedi, dep habarlaıdy Euronews.
Majarstan bıligi EO-nyń Security Action For Europe (SAFE) baǵdarlamasy aıasyndaǵy ótinimdi qaıta qarap, 5,4 mlrd eýro suraǵan. Bul soma burynǵy premer-mınıstr Vıktor Orban úkimeti suraǵan kólemniń úshten birine jýyq.
Premer-mınıstr Peter Madıar sáýirde qyzmetine kiriskennen keıin bastapqy ótinimdi qaıta qaraǵan. Buǵan deıingi ótinimge baılanysty sybaılas jemqorlyq táýekelderi bolýy múmkin degen kúdik aıtylǵan.
Italııa da SAFE baǵdarlamasy boıynsha qorǵanys nesıesine suranysyn 14,9 mlrd eýrodan 8 mlrd eýroǵa deıin qysqartty.
SAFE baǵdarlamasynyń jalpy kólemi – 150 mlrd eýro. Qarajat EO-ǵa múshe 19 memleket arasynda bólinedi. Baǵdarlama Eýropanyń qorǵanys ónerkásibin nyǵaıtyp, áskerı daıyndyq deńgeıin arttyrýǵa baǵyttalǵan.
SAFE Eýrokomıssııanyń 2030 jylǵa deıingi qorǵanys salasyna qosymsha 800 mlrd eýro jumyldyrýdy kózdeıtin «Daıyndyq-2030» josparynyń bir bóligi.
Baǵdarlama talaptaryna sáıkes, satyp alynatyn qarý-jaraq pen áskerı júıeler qunynyń keminde 65%-y EO elderi, Ýkraına nemese Eýropalyq ekonomıkalyq aımaq pen Eýropalyq erkin saýda qaýymdastyǵyna kiretin elderde óndirilgen ónim bolýy kerek. Qalǵan 35%-yn úshinshi memleketterden jetkizýge bolady.
Aıta keteıik, buǵan deıin Majarstan EO-dan mıgratsııa erejesin buzǵany úshin salynǵan táýligine €1 mln aıyppuldy óteýdi talap etetinin málimdegen.
