Majarstan EO-dan mıgratsııa erejesin buzǵany úshin salynǵan táýligine €1 mln aıyppuldy óteýdi talap etedi
ASTANA. KAZINFORM – Majarstan Eýropalyq odaqtan mıgratsııa salasyndaǵy ortaq erejelerdi saqtamaǵany úshin elge salynǵan aıyppuldy óteýdi talap etpek. Býdapesht bul áli kúnge deıin táýligine €1 mln tólep keledi. Sonymen qatar Majarstan bosqyndar men mıgranttarǵa qatysty ustanymyn ózgertpek emes, dep habarlaıdy reseılik TASS.
Bul týraly Majarstan premer-mınıstri Peter Madıar Býdapeshtte Eýropalyq halyq partııasynyń tóraǵasy Manfred Vebermen kezdesýden keıin málimdedi.
Madıardyń aıtýynsha, Eýropalyq halyq partııasynyń basshysy Majarstanǵa baspana berý erejelerine baılanysty táýligine €1 mln aıyppul tóleýden bosatatyn sheshim tabýǵa kómektesýge daıyn ekenin bildirgen.
Premer-mınıstr Majarstan shekarasyn qorǵaýdy jalǵastyratynyn aıtty. Sondaı-aq EO-nyń jańa bıýdjetin talqylaý kezinde el osy ýaqytqa deıin tólep kelgen aıyppuldy óteýdi talap etetinin jetkizdi.
Madıar bul máseleni Býdapeshtke keletin Eýropalyq keńes tóraǵasy Antonıý Koshtamen kezdesýde de kótermek. Koshta Eýropalyq odaqtyń jańa jeti jyldyq bıýdjetin talqylaý úshin múshe memleketterdiń astanalaryn aralap júr.
2024 jylǵy maýsymda Eýropalyq odaq soty Majarstanǵa €200 mln kóleminde birjolǵy aıyppul saldy. Sot eldi sheshimdi oryndaý merzimin keshiktirgen ár kún úshin taǵy €1 mln tóleýge mindettedi. Aıyppul EO-nyń baspana berý jáne kóshi-qon salasyndaǵy erejelerin saqtamaǵany, sondaı-aq mıgranttardy elden shyǵarǵany úshin salyndy.
12 sáýirdegi saılaý qorytyndysy boıynsha bılikke kelgen Majarstannyń jańa úkimeti bul aıyppuldy tóleýdi jalǵastyryp keledi.
Madıar buǵan deıin Eýropalyq odaqtyń Majarstanǵa qatysty ustanymyn ádiletsiz dep ataǵan. Ol úkimeti úshinshi álem elderinen myńdaǵan bosqyndy el aýmaǵyna kirgizýge jol bermeıtinin málimdegen.
Sonymen birge premer-mınıstrdiń aıtýynsha, jańa úkimet EO basshylyǵymen burynǵy úkimetke qaraǵanda syndarly qarym-qatynas ornatqan. Alaıda Býdapesht Majarstannyń múddesin qorǵaýdy jalǵastyrady.
Madıar úkimeti halyqaralyq máselelerdiń birqataryna qatysty ustanymyn Vıktor Orban kabınetimen salystyrǵanda ózgertti. Alaıda Brıýsseldiń kóshi-qon saıasatyna qatysty burynǵy ustanym saqtaldy. Qazirgi bılik EO-men tikeleı teketireske barmaı, ymyraly sheshimder izdeýge basymdyq berip otyr.
Osyǵan deıin Peter Madıardyń Majarstannyń premer-mınıstri qyzmetine resmı túrde kiriskeni týraly jazdyq.
