Majarstan elshisi Keıkiniń bas súıegi týraly: Shyndyq tuǵyryna qondy
ASTANA. QazAqparat - Keıki batyrdyń bas súıeginiń jerlenýi qaraly rásim bolǵanymen, batyrdyń óz elinde máńgilikke tynym tapqany jubata túsedi. Bul týraly QR-daǵy Majarstannyń Tótenshe jáne Ókiletti elshisi Andrash Baranı aıtty, dep habarlaıdy «QazAqparat» HAA tilshisi.
«Qazaqstan tarapymen ǵylymı turǵyda da baılanysymyz myǵym. Naqtyraq aıtqanda, Majarstan Tabıǵattaný mýzeıiniń ishinde Antropologııa ınstıtýty bar. Sol ınstıtýttyń mamandary Keıki batyrdyń súıegine zertteý jumystaryn júrgizdi. Majar ǵalymdary batyrdyń bas súıegine saı túr-álpetin jasap shyǵardy. Bul da qazaqstandyq-majarlyq rýhanı baılanystyń sımvolıkalyq dáleli dep aıtar edim. Keıkiniń Arqalyqtaǵy bassúıegin jerleý rásimine qatysqanymdy úlken qurmet dep bilemin. Sol jerleý rásimine jalǵyz memleketten elshi bolyp men ǵana shaqyrylǵanymdy atap ótkim keledi», - deıdi Andrash Baranı.
Elshiniń aıtýynsha, majar ǵalymdary Keıki batyrdyń qurmetine shyǵarylǵan medaldarǵa laıyqty túrde ıe bolǵan.
«Áý basta jerleý rásimi qaraly rásim sekildi kórindi maǵan. Men tipti osy úshin qara galstýk taǵyp alǵan edim. Ekinshi jaǵynan, bul kún - shyndyq tuǵyryna qonǵan, qýanysh kúni. Qazaq halqynyń batyry týǵan topyraǵyna jerlenip, bostandyq úshin basyn báıgege tikken tulǵalardyń biri retinde esimi tarıhqa qashala tústi», - deıdi ol.
