Majarstan delegatsııasy Shymkentke kelip, iskerlik baılanysty talqylady
ASTANA. KAZINFORM — 7 qazanda Majarstannyń Debretsen qalasynyń ákimi Laslo Papp myrza bastaǵan delegatsııasynyń Shymkentke sapary bastaldy.
Sapar aıasynda Debretsen delegatsııasy men Shymkenttiń bıznes-qoǵamdastyǵy ókilderiniń qatysýymen bıznes-forým ótti. Onyń barysynda taraptar saýda-ekonomıkalyq jáne ınvestıtsııalyq yntymaqtastyqtyń perspektıvaly baǵyttaryn, sondaı-aq birlesken jobalardy iske asyrý múmkindikterin talqylady.
Sapardyń jalǵasy retinde eki qalanyń iskerlik toptary ókilderi arasynda jańa iskerlik baılanystar ornatýǵa jáne birlesken bastamalardy damytýǵa baǵyttalǵan ekijaqty B2B kezdesýleri uıymdastyryldy.
Qalalyq Dendrosaıabaqta Debretsen qalasynyń ákimi men bıznes-qoǵamdastyq ókilderiniń qatysýymen aǵash otyrǵyzý rásimi taǵy bir sımvoldyq oqıǵa boldy. Atalǵan aktsııa eki qala arasyndaǵy dostyqtyń jáne berik ári uzaq merzimdi baılanystardy damytýǵa degen umtylystyń sımvolyna aınaldy.
Sapar barysynda Laslo Papp myrza jergilikti buqaralyq aqparat quraldaryna suhbat berip, óńiraralyq yntymaqtastyqtyń perspektıvalary men eki qala arasyndaǵy áriptestik qatynastardyń mańyzy týraly aıtty.
Qalalar arasynda baýyrlastyq qatynastardy ornatýdyń josparlanýy saparǵa erekshe mán beredi. Bul Shymkent pen Debretsen arasyndaǵy baılanystardy odan ári nyǵaıtýǵa jáne iskerlik, mádenı jáne gýmanıtarlyq salalardaǵy yntymaqtastyqty keńeıtýge baǵyttalǵan praktıkalyq qadam bolady.
