Majarstan 17 jyl ishinde Qazaqstan ekonomıkasyna 269 mln dollar ınvestıtsııa salǵan
Bul týraly QR Premer-Mınıstriniń orynbasary – Syrtqy ister mınıstri Muhtar Tileýberdi Majarstannyń syrtqy ekonomıkalyq baılanystar jáne syrtqy ister mınıstri Peter Sııartonyń Qazaqstanǵa jumys sapary barysynda aıtty.
«Majar dostarymyzdyń elimizge sapary Qazaqstan men Majarstan arasyndaǵy dıplomatııalyq qarym-qatynastyń 30 jyldyq mereıtoıymen tuspa-tus kelýiniń sımvoldyq máni zor. Búgin biz Peter Sııarto myrzamen ashyqtyq pen ózara túsinistik rýhynda saıası, saýda-ekonomıkalyq jáne mádenı-gýmanıtarlyq salalardaǵy Qazaqstan-Majarstan baılanystaryn talqylap, jahandyq jáne óńirlik kún tártibiniń kókeıkesti máseleleri boıynsha pikir almastyq. Sonymen qatar, majar áriptesterimizdi elde júzege asyrylyp jatqan aýqymdy saıası reformalar men birqatar áleýmettik-ekonomıkalyq sharalar týraly aqparatpen tanystyryp óttim», - dedi Muhtar Tileýberdi BAQ ókilderine bergen málimetinde.
Onyń málimeti boıynsha, eki eldiń arasnyda saýda-ekonomıkalyq jáne ınvestıtsııalyq yntymaqtastyq qarqyndy damyp keledi.
«Koronavırýs indetine qaramastan, ótken jyly ekijaqty taýar aınalymy 23,2% ósip, 138,7 mln dollarǵa jetti. Qazaqstannyń Majarstanǵa eksportyn ártaraptandyrý maqsatynda munaı-gaz óńdeý, metallýrgııa, hımııa, qurylys jáne azyq-túlik ónerkásibi ónimderimen qamtamasyz etýge daıyn ekenimizdi jetkizdik. 2005 jyldan beri Qazaqstan ekonomıkasyna Majarstannan 269 mln AQSh dollary kóleminde tikeleı ınvestıtsııalar tartyldy jáne bul kórsetkish jyldan jylǵa ósip keledi. Otandyq naryqta «MOL», «Gedeon Richter», «Egis» jáne taǵy da basqa iri majar kompanııalary jumys isteıdi», - dedi mınıstr.
Buǵan deıin Qazaqstannyń Majarstanǵa eksporttaıtyn ónim quny 15,4 mln dollarǵa jetkenin jazǵan edik.
