Majarlar Berel qorymyna táý etpek

ÓSKEMEN. QazAqparat - «Jibek joly salt at ústinde» atty halyqaralyq ekspedıtsııasy músheleri Shyǵys Qazaqstanǵa saıahat uıymdastyrmaq. Osylaısha olar da «Rýhanı jańǵyrýǵa» ún qospaq, dep habarlaıdy QazAqparat tilshisi.

Atalmysh sapar bıylǵy maýsym aıyna josparlanyp otyr. Ekspedıtsııany uıymdastyrýshy «Eýrazııalyq birlik úshin» qoǵamdyq qorynyń prezıdenti Ishtvan Bentse oblys ákimi Danıal Ahmetovpen kezdesýinde  osylaı dedi.

«Astanadan Qaraqorymǵa deıin» dep atalatyn bul sapar «Almatydan Majarstanǵa deıin» jáne «Býdapeshten Astanaǵa deıin» atty ekspedıtsııalardyń jalǵasy bolmaq. Itvan Bentseniń basshylyǵymen úsh adamdyq top ejelgi ǵundar sııaqty kıinip, joldyń basym bóligin salt atpen júrip ótpek.

 «Bul osydan ondaǵan ǵasyr buryn shyǵystan batysqa qaraı qonys aýdarǵan ata-babalarymyzdyń basynan ótkergenin seziný úshin jasalyp otyr»,  - deıdi majarstandyq saıahatshy.

Kezdesý barysynda majarstandyq meıman oblys ákimine ekspedıtsııa júrip ótetin marshrýtty da tanystyrdy. Onyń aıtýynsha, Astanadan shyqqan saıahatshylar Ereımentaý, Ekibastuz, Pavlodar, Semeı, Óskemen, Úlken Naryn, Qatonqaraǵaı sııaqty úlkendi-kishili eldi mekenderde aıaldap, Berel qorymyndaǵy prototúrkilerdiń qorymyna táý etpek. Budan keıin ol Mońǵolııaǵa jol tartady.

«Ata-babalarymyz ǵundar sııaqty joldyń negizgi bóligin at ústinde júrip ótpekpiz. Saparymyzdy bastan-aıaq beınekameraǵa túsirip otyramyz dep sheshtik. Osy arqyly bir-birimizdi jaqynyraq tanı túsemiz, eki el arasyndaǵy mádenı, rýhanı baılanysty nyǵaıtýǵa shama-sharqymyzsha úlesimizdi qosamyz dep úmittenemin» - degen Ishtvan Bentse.

Jalpy, bes jyl ishinde salt atty saıahatshylar Majarstan, Bolgarııa, Grýzııa, Serbııa, Ázerbaıjan, Túrkııa, Ózbekstan, Túrikmenstan, Reseı, Mońǵolııa, Qytaı men Ońtústik Koreıa elderin atpen aralap shyqpaq.