Majar qypshaqtarynyń mádenıeti festıvalinde Uly Dalanyń etnoburyshy tanystyryldy
ASTANA. QazAqparat - 2017 jylǵy 2 qyrkúıekte Býdapesht qalasynda Qazaqstan Respýblıkasynyń elshiligi Majar qypshaqtarynyń mádenıeti festıvaline qatysty. Majarstan Aýyl sharýashylyǵy mınıstri Shandor Fazekash óz sózinde Uly Dalanyń urpaqtary bolyp sanalatyn majar qypshaqtarynyń salt-dástúrine arnalǵan festıvaldiń mańyzdy ekenin atap ótti.
Mınıstr Qazaqstan elshisi Nurbah Rústemovke atalǵan is-sharaǵa qoldaý kórsetkeni úshin alǵysyn bildirdi. Óz kezeginde, qazaqstandyq dıplomat Qazaqstan elshiligi Memleket basshymyz Nursultan Nazarbaevtyń «Bolashaqqa kózqaras: Qoǵamdyq sanany jańǵyrtý» maqalasynyń negizgi aspektilerin iske asyrý, sondaı-aq eki el arasynda mádenı-gýmanıtarlyq yntymaqtastyqtyń joǵary deńgeıin qoldaý aıasynda elshiliktiń festıvalge qatysyp otyrǵanyn atap ótti.
Festıval sheńberinde qonaqtardy qazaq halqynyń salt-dástúrimen, mádenıetimen tanystyratyn etnoburysh jasaqtaldy. Oǵan qosa, qonaqtarǵa kádesyılar men ımıdjdik materıaldar taratyldy, sondaı-aq olar qazaqtyń taǵamdarynan dám tatty.
Etnoburysh festıval qonaqtarynyń Uly Dala tarıhyna degen erekshe qyzyǵýshylyǵyn arttyrǵanyn atap ótý qajet.
1990 jyly «Majarstan qypshaqtarynyń odaǵy» quryldy, Qurmetti kóshbasshysy Qazaqstan Respýblıkasynyń Prezıdenti Nursultan Nazarbaev bolyp saılandy. Qazirgi tańda Majarstanda HІІІ ǵasyrda qazirgi Qazaqstan aýmaǵynan Eýropaǵa qonys aýdarǵan shamamen 300 myń qypshaq urpaqtary turady.
