Majar kompanııasy Qazaqstannyń birneshe óńirinde kún elektr stansasyn salady

Majarstannyń Globalia kompanııasy Qazaqstannyń birneshe óńirinde kún elektr stansalaryn salady. Bul týraly Majarstan Premer-Mınıstri Vıktor Orban men Memleket basshysy Qasym-Jomart Toqaevtyń Aqordadaǵy kezdesýden keıingi birlesken málimdemesinen málim boldy, dep habarlaıdy Kazinform agenttigi.

«Qazirgi tańda qos memleket arasynda sheshimin tappaǵan másele joq. Búgin Vıktor Orban myrzamen strategııalyq seriktestikti odan ári tereńdetýge baǵyttalǵan nátıjeli kelissóz júrgizdik. Jan-jaqty áriptestikti, yqpaldastyqty nyǵaıtý halyqtarymyzdyń múddesine saı keledi. Biz búgin naqty ári mańyzdy kelissózge qol jetkizdik. Ásirese ekijaqty saýda-sattyq kólemin ulǵaıtýǵa jáne ınvestıtsııalyq yntymaqtastyqty damytýǵa basa mán berdik. Osy oraıda taýar túrin kóbeıtip, jańa múmkindikterdi paıdalaný asa mańyzdy», — dedi Memleket basshysy.

Qasym-Jomart Toqaev Qazaqstan Majarstanǵa quny shamamen 700 mln dollar bolatyn 95 túrli taýar jetkize alatynyn atap ótti.

«Energetıka, metallýrgııa, mashına jasaý, munaı-hımııa, aýyl sharýashylyǵy jáne qurylys salalary boıynsha ónim eksporttaýǵa múmkindik bar. Biz ınvestıtsııalyq seriktestikti odan ári jandandyrý úshin iri jobalardy birlesip iske asyramyz dep ýaǵdalastyq. Sondyqtan ózara tıimdi jobalar tizimi ázirlenedi», — dedi Prezıdent.

Onyń aıtýynsha, Batys Qazaqstan oblysyndaǵy Rojkov gaz kenishi jyl sońyna deıin iske qosylady. 

«Onda Majarstannyń MOL munaı-gaz kompanııasynyń úlesi 192 mln dollar bolmaq. Sondaı-aq, Globalia kásiporny elimizdiń birqatar aımaǵynda kún energııa stansalaryn salýdy josparlap otyr. Jobanyń quny - 150 mln dollar», — dedi Qasym-Jomart Toqaev.