Majar ınvestory Atyraýda kúnnen energııa alý jobasyn usyndy
Bul týraly Atyraý oblysynyń ákimi Serik Shápkenovpen kezdesken majarstandyq «Globalia» kompanııasynyń dırektory Gabor Shagı málim etti.
Oblys ákimi Serik Shápkenovtiń málimetinshe, bıylǵy 6 aıda Atyraý oblysynyń Majarstanmen ishki saýda aınalymy 894 myń AQSh dollaryna jetken. Onyń ishinde eksport kólemi 440 myń AQSh dollaryn, ımporttyń úlesi 454 myń AQSh dollaryn quraǵan.
Taraptar ekonomıkalyq, iskerlik baılanysty bekemdeı túsýdiń yqtımal baǵyttaryn talqylady. Majarstan kásipkeri Atyraýda qýaty 100 MVt bolatyn kúnnen qýat alý parkin salýdy usynyp otyr.
«Atyraý oblysynyń ekologııalyq ahýaly kóńil bólýdi qajet etedi. Osy oraıda kúnnen qýat alý jobasynyń mańyzy zor. Oǵan qajetti sý kózin «Sasyqsaı» býlaný alańynan alýdy usynǵym keledi. Qazir oblysqa qarasty keı aýdandar elektr jelisin kórshiles Reseı Federatsııasynan alyp otyr. Ony óz balansymyzǵa alý úshin birneshe shaqyrym jeli tartyp, beket ornatqansha, osy jobaǵa sáıkes 20 mVattyq ındýstrııalyq saıabaq salǵan áldeqaıda tıimdi bolar edi. Bul jobaǵa qoldaý tanytamyz. Bizdiń taraptan qajetti kómek kórsetiledi», -dedi Serik Shápkenov.
Sheteldik ınvestor ekologııalyq taza energııamen qamtamasyz etetin «kún sáýlesiniń kómegimen sýtegi generatory arqyly jasyl energııa alý» jobasynyń tıimdiligine tarqatyp berdi.
«Qalany úzdiksiz elektr energııamen jabdyqtaýdyń bir nusqasy – sýtegi generatory. Ony óndirýge qajetti energııa kúnnen qýat alý saıabaǵy nemese jel elektr stantsııalary arqyly óndiriledi. Elektrolız kezinde alynǵan sýtegi gazyn shaǵyn elektr qurylǵylaryna, avtobýstarǵa, avtomobılderge jáne tipti úlken elektr qondyrǵylaryna qýat berý úshin paıdalanýǵa bolady. Sýtegi generatory janar-jaǵarmaı generatorlarymen birdeı otyn mólsheri bolsa da, oǵan qaraǵanda uzaq jumys isteıdi», -deıdi Gabor Shagı.
Eske sala ketelik, buǵan deıin Atyraý oblysynda elektr jelisin kúsheıtý jobasy júzege asyrylyp jatqanyn jazǵan bolatynbyz.