Mazasyz tún: Ońtústik óńirlerde malshylar joǵalyp, Temirtaýda qubyr jaryldy
Ótken túnde eldiń ońtústik óńirlerinde malshylar joǵalyp, eldiń shyǵysynda joldar jabyldy, dep habarlaıdy Kazinform.
Ótken táýlikte qutqarýshylar eldiń búkil óńirinde 311 márte halyqqa kómekke kelgen.
Onyń barysynda 147 adam qutqarylyp, evakýatsııalandy, onyń ishinde 13 bala bar.
Ádette qysy Soltústik pen Shyǵysqa qaraǵanda jaıly dep esepteletin ońtústik óńirlerde de qystyń qahary kádimgideı sezilip tur.
Túrkistan oblysy
Mysaly, keshe túnde Túrkistan oblysynda qatty aıazdan joldar jabylyp, búgin mektepter qashyqtant oqýǵa kóshti.
Óńirdegi menshikti tilshimizdiń habarlaýynsha, oblystyń taýly aımaqtarynda burqasyn jel bastalyp, kún raıy kúrt ózgergen.
Báıdibek pen Túlkibas aýdandaryn baılanystyratyn jol, «Batys-Eýropa-Batys-Qytaı» trassasy, Qoshqarata-Jaryqbas-Birlik, Shaıan-Aǵybet-Shaqpaq, Kóksáıek-Aqsý-Myńbulaq baǵytyndaǵy joldar jabylǵan.
Keı jerde qalyń qar bassa, keı joldarǵa muz qatqan.
Kúsheıtilgen rejımde jumys istep jatqan patrýldik polıtsııa batalony keshke keshkisin jolda adasyp ketken birneshe jeńil kóliktiń jolaýshylaryn qutqardy.
«Tártip saqshylary turǵyndardyń qaýipsizdigi úshin úzdiksiz qyzmetti jalǵastyrady jáne turǵyndarǵa uzaq jolǵa shyqpaýǵa keńes beredi», — delingen Túrkistan oblysy polıtsııa departamentiniń baspasóz qyzmeti taratqan aqparatta.
Qatty aıazdyń saldarynan Sozaq, Ordabasy, Kentaý qalalarynda bastaýysh synyp oqýshylary qashyqtan oqyp jatyr.
Osy Túrkistan oblysynda shopan boranda bir otar qoıymen birge joǵalyp ketkeni málim boldy.
Oqıǵa Otyrar aýdanyna qarasty Sarykól aýylynda bolǵan. Іzdeý jumystary túnimen júrgizilip, tańǵy saǵat bester shamasynda qutqarýshylar 58 jastaǵy er adamdy tapty.
«Іzdestirý kezinde shopan Sarykól aýylynan 20 shaqyrym jerden tabyldy. Er adam jol boıyndaǵy qorany panalaǵan. Jaýrap qalǵan. Qazir qaýipsiz jerge jetkizildi. Qoılary da túgel» delingen Túrkistan oblysy TJD baspasóz qyzmeti taratqan aqparatta.
Jambyl oblysy
Jambyl oblysynda da qar qursaýynda qalǵan baqtashylar aman-esen tabyldy
12 jeltoqsany kúni saǵat 00:24 shamasynda polıtsııa bólimine Shý aýdany Kókqaınar aýylynan 15 shaqyrym jerde sharýa qojalyqtardyń birinen 2 malshysy adasyp, joǵalyp ketkeni týraly habar túsken bolatyn.
Polıtsııa qyzmetkerleri, aýdan ákimdigi men tótenshe jaǵdaı mamandary, jergilikti turǵyndar arnaıy tehnıkanyń kómegimen iz kesýge shyqqan.
«Jedel-izdestirý jumystarynyń nátıjesinde túngi saǵat 3:00 kezinde malshylar jáne qaraýyndaǵy maldary aman-esen tabyldy. Qutqarylǵan azamattardyń jaǵdaıy birqalypty, medıtsınalyq kómekti qajet etpedi», — dedi Shý aýdany polıtsııa bóliminiń bastyǵy polıtsııa podpolkovnıgi Dinmuhambet Qoıtórıev.
Sondaı-aq, Jambyl oblysy Jambyl aýdanyndaǵy Qyzylqaınar, Jasórken, Jalpaqtóbe, Qyzyldıhan, Grodekovo aýyldarynyń turǵyndary gazsyz otyr. Qubyr jarylyp, 1 myńǵa jýyq úı jylýsyz qalǵan.
Atalmysh eldi mekenderdegi 8 áleýmettik nysan da jylýdan ajyrap qalǵan.
Apatqa baılanysty aımaqta arnaıy shtab quryldy.
Qyzylorda oblysy
Qyzylorda oblysynda borandy kúni mal izdeýge shyqqan 16 jasar jasóspirim joǵalyp, aman tabyldy.
Óńirde 11 jeltoqsan kúni aýa raıy kúrt ózgerip, 25 gradýsqa deıin sýytqan.
Sol kúni kúndizgi saǵat 10:00 shamasynda 46 jastaǵy azamat 16 jasar ulymen birge Jalaǵash aýdanyna qarasty Jańadarııa aýylynan 20 shaqyrym qashyqtyqta ornalasqan Aqshoqy ýchaskesinde fazendadan eki jaqqa bólinip, mal izdeýge shyqqan.
Saǵat 14:00 shamasynda ákesi fazendaǵa qaıta oralyp, balasynyń fazendaǵa áli kelmegenin biledi. Alǵashqyda avtokólikpen ulyn izdeýge ózi shyǵady. Áreketi sátsiz bolyp, ol polıtsııaǵa júginýge májbúr bolǵan.
Jasóspirimdi izdestirýge Jalaǵash aýdandyq polıtsııa bóliminiń jeke quramy dereý jumyldyryldy.
Polıtseıler, tótenshe jaǵdaı departamentiniń qyzmetkerleri, aýyl turǵyndary men eriktilerden arnaıy top quryldy.
Aýdannyń barlyq aýyly, dalalyq joldar túgel qamtyldy. Іzdestirý sharalarynyń nátıjesinde joǵalǵan bala túngi saǵat 2:00–de Jalaǵash aýdany Jańadarııa aýylyna qarasty dalalyq jerden soltústikke qaraı 20 shaqyrym jerden tabyldy.
Qaraǵandy oblysy
«Vechernıaıa Karaganda» resýrsynyń málimetinshe, Qaraǵandy oblysynyń Saran qalasynda gaz ballony jarylǵan. Jer úıdiń ıesi qatyp qalǵan ballondy jylyna bersin dep peshtiń janyna qoıyp ketken. Saldarynan gaz jarylyp, úı turýǵa jaramsyz kúıge túsken.
Al Temirtaýda mamandar qatyp qalǵan sý qubyryn jóndep jatyr. Keshe túnde dıametri 300 mm bolatyn magıstral qatyp qalǵan.
«Sý qubyrynyń qatyp qalýyna baılanysty qalanyń shyǵys bóligindegi alty kvartal turǵyndarynyń úıine gıdravlıkasy tómendetilgen sý berilip jatyr. Problemalyq aımaq anyqtaldy (shamamen 20 m). Sýmen jabdyqtaýdyń shtattyq rejımin qalpyna keltirýge 8 brıgada men 10 tehnıka tartyldy», — dep habarlady «Oqjetpes-T» JShS.
Almaty qalasy
Almatyda qatty aıazdyń áserinen qoǵamdyq kólik syr berip jatyr. Sýyqtan týyndaǵan tehnıkalyq aqaý saldarynan birneshe avtobýs marshrýttan alynǵan.
Ákimdik marshýrttyq avtobýstardyń keshigýine joldaǵy kólik tyǵyny da áser etip jatqanyn málimdep otyr.
Aqmola oblysy
Sondaı-aq búgin túnde Aqmola oblysynda 31 sheteldik mingen avtobýs buzylyp, jolaýshylar qar qursaýynda qaldy.
Astana-Petropavl tasjolynda buzylǵan avtobýstan 31 sheteldik evakýatsııalandy. Onyń bári — Tájikstan azamattary, ishinde eki bala bar.
Evakýatsııalanǵan adamdar Kókshetaý qalasyndaǵy jylý pýnktine jetkizildi.
Esterińizge sala keteıik, buǵan deıin 9 jeltoqsanda qutqarýshylar 28 sheteldikti evakýatsııalaǵan edi.
