Mazarı-Sharıfte qazaqstandyq astyq termınalyn salýdyń qajeti joq - Asqar Mamın
NUR-SULTAN. QazAqparat - Aýǵanstannyń Mazarı-Sharıf qalasynda qazaqstandyq astyq termınalyn ne un qoımasyn salýdyń qajeti joq. Bul jaıynda Májilis depýtattarynyń resmı saýalyna jaýap bergen QR Premer-Mınıstri Asqar Mamın aıtty, dep habarlaıdy QazAqparat tilshisi.
Aıta keterligi, Májilistiń bir top depýtaty Úkimet basshysynyń atyna joldaǵan saýalynda Qazaqstannyń astyǵy men unyn aýǵan jáne túrikmen naryǵyna shyǵarý úshin Aýǵanstan Respýblıkasynyń Mazarı-Sharıf qalasynda nemese ózge shekaralas qalada astyq elevatoryn ne un qoımasyn salý múmkinshiligin qarastyrýdy usynǵan bolatyn. Depýtattardyń atap ótýinshe, mundaı termınal ne qoıma Aýǵanstan aýmaǵynda astyq pen un saýdasynyń jandanýyna septigin tıgizedi.
Osy máselege qatysty resmı jaýap bergen Asqar Mamın 2018 jyly «Qazaqstan temir joly» kompanııasy «Ýzbekıston temır ıýlları» AQ, «Týrkmendemırellary» agenttigi, Túrikmenstan Temir jol kóligi mınıstrligi jáne Aýǵanstan temir joldary basqarmasynyń, múddeli uıymdardyń qatysýymen kópjaqty kezdesý ótkizgen. Onda Qazaqstan tarapynyń Aýǵanstan aýmaǵynda termınaldar, astyq elevatory men un qoımasyn salýy máselesin qarastyrǵan.
«Sarapshylar ózbek-aýǵan jáne túrikmen-aýǵan shekarasyndaǵy kólik-logıstıkalyq ınfraqurylymdy baǵalaı kele, qoldanystaǵy termınaldardyń tolyq júktemege ıe bolmaı qalý táýekeline baılanysty qazaqstandyq taraptyń qosymsha termınal men elevator salýy maqsatqa saı emes degen qorytyndyǵa keldi», - dedi Premer-Mınıstr.
