Maııa Sandý Moldovadaǵy prezıdent saılaýynda alda keledi
KIShINEV. QazAqparat – Moldovada ótken prezıdenttik saılaýdyń ekinshi týrynda Maııa Sandý qazirgi prezıdent Igor Dodonnan basym daýysqa ıe bolyp otyr. Ekzıtpol málimetteri osyny kórsetip otyr, dep habarlaıdy QazAqparat BBC agenttigine silteme jasap.
Saılaýda Maııa Sandý jeńip shyqsa, Moldova prezıdenti bolyp 4 jylǵa saılanady.
Oǵan Belts-ten ózge iri qalalardyń barlyǵynyń turǵyndary, sonymen qatar Eýropa elderindegi jastar men dıaspora ókilderi daýys berdi.
Igor Dodonǵa aýyldyq aımaq turǵyndary daýys berdi. Alaıda bul daýystar onyń saılaýda jeńiske jetýine azdyq etip tur.
Al Sandýdyń jetistigi ózi oılaǵannan da qarqyndy boldy.
Eger birinshi kezeńniń qorytyndysy boıynsha, daýys berýge kelýshiler sany óte az bolsa, ekinshi kezeńge kelgenderdiń sany aıtarlyqtaı kóp boldy. Daýys berýshiler sany 2016 jyly ótken saılaýdyń ekinshi kezeńindegi saılaýshylardan da kóp boldy.
Eń belsendi saılaýshylar ádettegisinshe zeınetkerler boldy. Alaıda bul jolǵy saılaýda jastar da erekshe belsendilik tanytty. Basqa elderde turatyn dıaspora ókilderi osy saılaýda rekord ornatqan sııaqty.
Shyndyǵynda, bul saılaýda árbir altynshy moldovan basqa elden daýys berdi. 1,5 mıllıon daýystyń 250 myńǵa jýyǵy ózge elden berilgen.
Maııa Sandý Kıshınevte, Orgeevte, Kagýlda saılaýda sózsiz jeńiske jetti.
Dodondy Belts turǵyndary, aýyldyq aımaqtar, Prıdnestrove azamattary qoldady. Ol Gagaýzııada eń úlken jetistikke jetti, onda turǵyndardyń 95%-y Dodondy qoldap daýys berdi.
