Maııa Maneza Azııa oıyndaryna nege barmaı qaldy?
ASTANA. QazAqparat - Búgin Ońtústik Koreıanyń Inchhon qalasynda XVII Jazǵy Azııa oıyndarynyń alaýy tutandy.
Sońǵy jyldary álemdik básekelerden aýyr atletterge kóp úmit artatynymyz jasyryn emes. Sebebi, Olımpıada, álem, Azııa oıyndarynda qazaqstandyq aýyr atletterdiń qorjyny bos qaıtqan emes. Alaıda, búgin jalaýy jelbiregen «Saryqurlyq» dodasyna London olımpıadasynda top jarǵan birqatar chempıondarymyz barmaı qaldy. Solardyń biri - Maııa Maneza.
Qazir halyq kókeıinde Azııa oıyndaryna Zýlfııa Chınshanlo barǵanda Maııa Maneza nege barmaı qaldy degen suraqtyń týyndaýy ábden múmkin. Onyń ózindik sebebi bar. Bul týraly Maııa Maneza:«London olımpıadasynan keıin turmysqa shyqtym. Sosyn, ana atanyp, ómirge bala ákeldim. Osy sebepti eki jyldan beri bala kútimimen úıde otyryp qaldym. Bul jolǵy Azııa oıyndaryna sol sebepti qatysa almadym. Biraq joldasym qazaq eliniń namysyn qorǵaýǵa baıraqty básekege attanyp ketti. Bir úıden bir adam qatyssa da jetkilikti shyǵar dep ózimdi jubatyp, kúıeýimniń tileýin tilep otyrmyn», - deıdi Olımpıada chempıony. Kúnsultan Otarbaı
