Máıittik donor arqyly jasalatyn transplantatsııa sany úsh esege jýyq artty
ASTANA. KAZINFORM — Qazaqstanda sońǵy jyldary qaıtys bolǵan donorlardyń aǵzalaryn paıdalaný arqyly jasalatyn transplantatsııalar sany aıtarlyqtaı kóbeıdi.
Bul týraly Ortalyq kommýnıkatsııalar qyzmetinde ótken baspasóz májilisinde Respýblıkalyq transplantologııa jáne joǵary tehnologııalyq medıtsınalyq qyzmetterdi úılestirý ortalyǵynyń dırektory Aıdar Sıtkazınov aıtty.
Onyń sózinshe, 2024 jyly máıittik donorlardyń aǵzalaryn paıdalaný arqyly 23 transplantatsııa jasalsa, 2025 jyly bul kórsetkish 68-ge jetip, shamamen úsh esege ósken. Bul úrdis 2026 jyly da jalǵasyn taýyp otyr.
— Sonymen qatar qaıtys bolǵannan keıin donor bolǵan adamdar sany da kóbeıdi. Eger 2024 jyly olardyń sany 6 bolsa, 2025 jyly 18-ge jetken, — dedi ortalyq dırektory.
Aıdar Sıtkazınovtyń aıtýynsha, bul kórsetkishterdiń artýy transplantatsııa kútip júrgen naýqastardyń ómirin saqtap qalýǵa tikeleı áser etedi.
— Bir qaıtys bolǵan donor birneshe adamnyń ómirin saqtap qalýy múmkin. Sondyqtan máıittik donorlyqty damytý transplantologııa salasyndaǵy mańyzdy baǵyttardyń biri sanalady, — dedi ol.
Jalpy Qazaqstanda zamanaýı transplantatsııa qyzmeti iske qosylǵannan beri 3 270 aǵza transplantatsııasy jasaldy. Onyń 2 726-sy nemese 82%-y tiri donorlardyń qatysýymen, al 544-i nemese 18%-y qaıtys bolǵan donorlardyń aǵzalaryn paıdalaný arqyly oryndalǵan.
