Máıitin taný eń aýyr sát boldy: Nuraı Serikbaıdyń aǵalary sotta jaýap berdi

Sot otyrysynda marqumnyń týǵan aǵalary – Dinmuhammed pen Sultan jaýap berdi. Olar 2025 jyldyń qazan aıyndaǵy oqıǵalardy, keıingi ańdý áreketterin jáne qaıǵyly jaǵdaı bolǵan kúndi egjeı-tegjeıli baıandady.

Alǵash bolyp Nuraıdyń úlken aǵasy Dinmuhammed Serikbaev sóz aldy. Ol sottalýshyny alǵash ret 2025 jyldyń shildesinde týysynyń toıynda kórgenin aıtty. Sol sátte Aımahannyń Nuraıǵa kóz almaı qaraǵanyn baıqaǵan. Keıin Nuraı úıge gúl ákelip, bir jigittiń oǵan kóńil bildirýge tyrysyp júrgenin aıtqan. Alaıda olardyń arasynda jaqyn qarym-qatynas bolmaǵanyn jáne neke týraly áńgime bolmaǵanyn jetkizdi.

– Biz Nuraımen árdaıym ashyq sóılesetinbiz. Tamyz aıynyń sońynda ony Almatyǵa oqýǵa shyǵaryp saldyq. Ol turmysqa shyǵýdy oılaǵan joq. Onyń alǵa qoıǵan úlken josparlary boldy. Til úırenip, kıim dızaıny salasynda ózin damytý, 2026 jyldyń jazynda Eýropaǵa baryp, sol jaqtaǵy ýnıversıtetke túsý armany edi, – dedi Dinmuhammed Serikbaev.

Aǵasynyń aıtýynsha, otbasy sottalýshy jaıly tanystarynan surastyryp bilgen. Nátıjesinde onyń resmı jumysy joq, minezi ashýshań, jıi janjal shyǵaratyn adam ekeni belgili bolǵan. Osydan keıin týystary Nuraıǵa onymen aralaspaý keregin eskertken.

Kýáger 2025 jylǵy 5 qazanda Sherhan Aımahannyń Nuraıdy aldap ári qorqytý arqyly Almatydan Shymkentke alyp ketkenin aıtty.

– Anamnan «Nuraıdy alyp ketti, tez qaıt» degen habarlama keldi. Aǵam jáne kókemmen birge sottalýshynyń úıine barǵanymyzda, aýlada 50-ge jýyq adam jınalyp tur eken. Bizge qarsylyq kórsetip, ishke kirgizbedi. Іnim Sultan bir sátke úıge kirip, Nuraıdyń: «Men óz erkimmen kelgen joqpyn, meni bul jerden alyp ketińder!» dep sybyrlap aıtqanyn estigen. Sottalýshynyń týystary polıtsııa kelgenine qaramastan áreket etpeı, bizben janjaldasty, kıimimizden tartty. Tergeýshi olardyń úıinde shaı iship otyrǵan kezde, otbasy ýaqyt sozyp, ata-anamyz nekege kelisim berdi degen jalǵan aqparat taratýǵa tyrysty, – dedi marqumnyń aǵasy.

Dinmuhammedtiń aıtýynsha, keıin oqıǵaǵa qatysýshylar Qarataý aýdandyq polıtsııa basqarmasyna jetkizilgen kezde Nuraıǵa psıhologııalyq qysym kórsetilgen.

– Bizdi Nuraıǵa jolatpady, onyń kámelet jasyna tolǵanyn alǵa tartty. Al sottalýshynyń synyptasy men ákesi kabınetke erkin kirip júrdi. Nuraı qatty sharshaǵan, burynǵy qalpynan ózgerip, qatty qoryqqan edi. Keıin ol bizge beınejazbany jáne aryzdan bas tartý týraly jazbany qysymmen, bireýdiń aıtýymen jazdyrǵanyn aıtty. Oǵan sottalýshy endi eshqashan jaqyndamaıdy dep ýáde bergen, – dedi aǵasy.

Aǵasynyń aıtýynsha, ańdý áreketteri toqtamaǵan. Sottalýshy Shymkenttegi otbasynyń úıine birneshe ret kelip, Hyundai Mufasa kóligimen qyzdy ańdyǵan, qaqpa aldynda kútken, túrli nómirlerden qońyraý shalǵan. Sondaı-aq Almatydaǵy qurbylaryna habarlasyp, sabaq kestesin bilýge tyrysqan. Osydan keıin otbasy Nuraıdyń telefon nómirin aýystyrǵan.

– 10 qazanda onyń kóligin úıimizdiń janynan kórip, polıtsııa shaqyrdym. Polıtsııa shaqyrtýyn qabyldaǵan qyzmetkerge bul adamnyń buǵan deıin qaryndasymdy alyp ketkenin jáne qazir úıdiń aldynda turǵanyn aıttym. Alaıda ol shaqyrtýdy tirkemedi. «Nege senimdisiz? Múmkin kórshilerińizge kelgen shyǵar?» dedi. Polıtsııa aryzymyzdy qabyldamady, prokýratýra is qozǵaýdan bas tartty, – dedi Dinmuhammed Serikbaev.

Qaıǵyly oqıǵa bolǵan kúni, ıaǵnı 2026 jylǵy 11 qańtarda úlken aǵasy Shymkentten 500 shaqyrym qashyqta jumysta bolǵan. Ol bolǵan jaǵdaıdy Sultannan jáne jylap habarlasqan anasynan estigen. Keıin qaryndasynyń telefonynyń ornalasqan jeri máıithana ǵımaratyn kórsetken.

Dinmuhammed qaryndasynyń Sherhan Aımahanǵa turmysqa shyǵýdy eshqashan josparlamaǵanyn, ony alyp ketkennen keıin qatty qorqyp, qarym-qatynasty tolyq toqtatýǵa tyrysqanyn jetkizdi.

Sondaı-aq sotta marqumnyń kishi aǵasy, kásipker Sultan Serikbaı jaýap berdi. Ol kóz jasyn áreń tejep, sotqa tek shyndyqty aıtatynyn málimdedi. Ol sottalýshynyń ózara qarym-qatynas jáne qarjylaı kómek kórsetkeni týraly sózderin joqqa shyǵardy.

Sultan Aımahan týraly áriptesteri men tanystary arqyly aqparat jınaǵanyn aıtty. Sottalýshyny biletin adamdar ony dóreki minezdi jáne janjalǵa beıim adam retinde sıpattaǵan.

Ol 2025 jyldyń qazanynda qaryndasyn kúshtep alyp ketkennen keıingi jaǵdaıdy da baıandady.

– Keshki saǵat alty shamasynda kókem Nuraıdy alyp ketkenin aıtty. Biz birden Bozaryqtaǵy sottalýshynyń úıine bardyq. Aýlada 20 shaqty adam boldy. Úıge kirgenimde Nuraı áıelderdiń arasynda otyr eken. Olardy shyǵaryp, ekeýmiz jeke sóıleskende, ol meni qushaqtap, jylap: «Sultan, men seni kúttim. Men bul jerge óz erkimmen kelgen joqpyn, qorqyp turmyn» dedi. Men ony alyp ketemin dep ýáde berdim, – dedi Sultan Serikbaı.

Onyń aıtýynsha, Nuraıdy alyp shyǵýǵa tyrysqan kezde sottalýshynyń týystary qarsylyq tanytyp, qyzdy kúshpen bólmege qaıta kirgizgen. Keıin Sultan men kókesin syrtqa shyǵaryp jibergen. Shaqyrylǵan polıtsııa jasaǵy men tergeý toby shamamen 45 mınýttan keıin jetken.

Sultannyń sózinshe, polıtsııa kelgende de 20-ǵa jýyq er adam quqyq qorǵaý organdarynyń ókilderin úıge kirgizbegen. Sottalýshynyń ákesi bolǵan jaǵdaıdy «salt-dástúr» dep túsindirýge tyrysqan.

– Tergeýshi Ábilǵazy úıge kirip, dastarqanǵa otyryp shaı iship, mandarın jedi. Osylaısha ýaqytty sozdy. Sol ýaqytta bólmede Nuraıǵa psıhologııalyq qysym kórsetilip jatqan. Men qatań talap qoıǵannan keıin ǵana tergeýshi qaryndasyma kirip, keıin ony Aımahan men onyń ákesiniń qatysýymen polıtsııa basqarmasyna alyp shyqty, – dedi Sultan Serikbaı.

Polıtsııa bóliminde de qysym toqtamaǵan. Sottalýshynyń aınalasyndaǵy bógde adamdar kabınetterge emin-erkin kirip júrgen. Al Nuraıdyń kámelet jasyna tolǵanyn syltaý etip, týystaryn oǵan jolatpaǵan. Sol kúni keshke sottalýshy otbasyǵa nekege kelisim berý úshin 10 mln teńgege deıin aqsha usynǵan. Alaıda otbasy bul usynystan úzildi-kesildi bas tartqan.

Nuraı úıine oralǵannan keıin sottalýshy ony úzdiksiz ańdı bastaǵan. Ol Hyundai Mufasa kóligimen úıiniń mańynda kútip turǵan, Nuraı barısta bolyp jumys isteıtin kofehanaǵa baryp, onyń aǵasy týraly qaralaıtyn málimet tabý úshin qyzmetkerlerge aqsha usynǵan.

Osynyń saldarynan otbasy Nuraıdy qashyqtan oqytý formatyna aýystyryp, telefon nómirin birneshe ret ózgertken. Sondaı-aq oqýyn Shymkentke aýystyrýdy josparlaǵan. Alaıda polıtsııa men prokýratýra týystarynyń ótinishterine nazar aýdarmaǵan.

2026 jylǵy 11 qańtardaǵy oqıǵany baıandaǵan Sultannyń aıtýynsha, ol úıden shyǵardyń aldynda Nuraı bálish pisirýge qamdanyp, un alý úshin jaqyn mańdaǵy sýpermarketke ketken. Úıdiń mańynda sottalýshy ony kútip turǵan. Kýágerler Nuraıdyń «Maǵan tıispe!» dep aıqaılaǵanyn estigen. Osydan keıin shabýyl jasaǵan adam oǵan ólimge ákelgen jaraqattar salǵan.

Sultan túngi saǵat bir shamasynda qaryndasynyń máıitin tanýǵa ózi qatysqanyn aıtty. Onyń sózinshe, qyzdyń denesi men betinde kóptegen tereń pyshaq jaraqatynan saý jer qalmaǵan.

Sultan sot otyrysynda Aımahannyń Nuraı ony temeki shegýge úıretti degen sózin joqqa shyǵardy. Sultan sotqa sottalýshynyń qolynda temeki ustap turǵan, 2024 jyly, ıaǵnı ekeýi tanyspaı turyp túsirilgen fotosýretin usyndy. Jumsaq minezdi qaryndasyn qaralaýǵa tyrysyp jatqanyn aıtty. Onyń sózinshe, Nuraı eshqashan qarjylyq qıyndyq kórmegen, temeki shekpegen jáne ózin ańdyǵan adamnan qatty qoryqqan.

Sot talqylaýy jalǵasyp jatyr. Úzilisten keıin sot Nuraıdyń qurbysynan, sondaı-aq tergeýshi men prokýrordan jaýap alýdy josparlap otyr.

Eske salaıyq, búgin sotta qaıǵyly oqıǵanyń basty kýágeri Indıra Berkinbaeva jaýap berdi. Ol Nuraı Serikbaıdyń ómiriniń sońǵy mınýttaryn baıandap, shabýyl jasaǵan adamnyń jerde jatqan qyzǵa qaıta oralyp, oǵan pyshaq jaraqatyn salýdy jalǵastyrǵanyn aıtty. 

Negizgi sot talqylaýy 28 shildede bastaldy. Sottalýshy Sherhan Aımahan qasaqana adam óltirdi degen aıypty moıyndamaı, áreketin affekt jaǵdaıynda jasaǵanyn málimdedi. 

Marqumnyń ata-anasy men bala kúngi qurbysy qyzdy alyp ketý jáne odan keıingi ańdýǵa qatysty jaıttardy baıandady. 

Qaıǵyly oqıǵa 2026 jylǵy 11 qańtarda boldy. Tergeý málimetinshe, sottalýshy 21 jastaǵy qyzǵa 35 pyshaq jaraqatyn salǵan. Oǵan nekege turýǵa májbúrleý, ańdý (stalkıng) jáne asa qatygezdikpen jasalǵan adam óltirý baptary boıynsha aıyp taǵylǵan.