Maıtaban men valgýsty shatastyrmańyz: ortoped ata-analarǵa keńes berdi
ASTANA. KAZINFORM – Balasynyń aıaǵy qısaıyp júrgenin baıqaǵan kóptegen ata-ana maıtaban nemese basqa ortopedııalyq dıagnozdardan qaýiptenedi. Alaıda mamandardyń aıtýynsha, erte jastaǵy balalardyń aıaq qurylymyndaǵy ózgeristerdiń basym bóligi fızıologııalyq qalyptasý kezeńimen baılanysty.
Ortoped Oljas Baınazarovtyń aıtýynsha, ata-analar kóbine maıtaban men valgýstyq deformatsııany shatastyrady. Sonymen qatar keı jaǵdaıda dıagnoz dárigerge deıin qoıylyp, qajetsiz em-dom jasalyp jatady.
– Patologııa men fızıologııany ajyrata bilý kerek. Bir, eki nemese úsh jastaǵy balanyń aıaǵynyń qısaıýyn birden aýrý dep qaraýǵa bolmaıdy. Bul tabıǵı damý kezeńi. Qazir keıbir ata-analar aıaqtyń syrtqy kórinisine qarap alańdaıdy, al keıde dáriger emes adamdar dıagnoz qoıyp jatady. Sondyqtan eń aldymen ortoped mamannyń qaraýy qajet, – deıdi dáriger Jibek Joly telearnasynyń «Búgin.LIVE» baǵdarlamasynda.
Mamannyń sózinshe, ortopedııada maıtaban dıagnozy 7-8 jastan keıin ǵana qoıylady. Oǵan deıin balalarda jalpaq taban men valgýstyq ornalasý fızıologııalyq norma sanalady.
– Taban kúmbezi men aıaq bulshyqetteriniń tolyq qalyptasýy 5-9 jas aralyǵynda júredi. Osy kezeńde taban tabıǵı túrde kúmbezdenip, óz qalpyna keledi. Sondyqtan jeti-segiz jasqa deıin maıtaban dıagnozyn qoımaımyz. Oǵan deıin bul fızıologııalyq jalpaq taban retinde sanalady, – dedi Oljas Baınazarov.
Dárigerdiń aıtýynsha, búginde balalar arasynda maıtabannyń jıi kezdesýi qozǵalystyń azaıýymen baılanysty. Ásirese mektep jasyna deıingi kezeńde belsendi qımyl-qozǵalys tabannyń durys qalyptasýyna yqpal etedi.
– Balalardy kedir-budyr jerlermen júrgizý kerek. Tas ústinde, shópte jalańaıaq júrý paıdaly. Aıaqtyń ushymen júrý, oıyn túrindegi jattyǵýlar, qarapaıym sekirtpe jippen shynyǵý sııaqty tásilder taban bulshyqetterin nyǵaıtady. Burynǵy balalardyń dalada kóp júrýiniń ózi úlken paıda bergen, – deıdi maman.
Ortopedtiń málimetinshe, maıtaban kóbine artyq salmaǵy bar nemese qosymsha sozylmaly aýrýlary kezdesetin balalarda saqtalyp qalady.
– Bul dıagnoz kóbine bulshyqet tonýsy álsiz, artyq salmaǵy bar balalarda kezdesedi. Sonymen qatar nevrologııalyq, endokrınologııalyq nemese damý erekshelikteri bar balalarda tabannyń qalyptasýy baıaý júrýi múmkin, – dep túıindedi dáriger.
Maman ata-analarǵa balany bir jasqa deıin 4 ret ortopedke kórsetýdi usynady. Onyń aıtýynsha, nárestelerdegi aıaqtyń azdap qısaıýy kóp jaǵdaıda qalypty fızıologııalyq qubylys.
Aıta keteıik, buǵan deıin, balalardyń 70 paıyzynda maıtabandyq bar ekenin jazǵan edik.
