Maıra Muhamedqyzy «Búkilálemdik duǵany» oryndap, dárigerlerge alǵys aıtty
NUR-SULTAN. QazAqparat – Qazaqstanda «Búkilálemdik duǵa» atty álemdik tanymal týyndyǵa klıp túsirildi. Bul týraly QazAqparat Teatrdyń baspasóz qyzmetine silteme jasap habarlaıdy.
«Astana Opera» jetekshi solısi Maıra Muhamedqyzy dúnıejúzi dárigerlerine arnap «Búkilálemdik duǵany» oryndady.
«Men barlyǵy úshin án salmaımyn, men árbir adam úshin án salamyn. Búginde dárigerler men medıtsına qyzmetkerleriniń jankeshtiligi men tabandylyǵyna tórtkúl dúnıe qaıran qalýda. Búgingi kúnniń batyrlary bul – basqanyń ómiri úshin shybyn janyn shúberekke túıip, kúndiz-túni qyzmet etip júrgen dárigerler. Jer-jerde koronavırýsqa shaldyqqandar sany artýda. Degenmen, jazylyp shyqqandardyń sany da az emes. Árıne buǵan aq halatty abzal jandardyń eren eńbeginiń arqasynda qol jetkizip jatyrmyz»- dep atap ótti ataqty ánshi Maıra Muhamedqyzy.
Aıta ketsek, «Habar» Agenttigi QR Mádenıet jáne sport mınıstrligi, «Astana Opera» MOBT-men birge dárigerlerge arnap «Búkilálemdik duǵa» atty álemdik tanymal týyndyǵa klıp túsirdi. Bul grek kompozıtory Vangelıstiń klassıkalyq shyǵarmasy. Buǵan qosa klıpte koronavırýspen kúresip júrgen dúnıejúzi dárigerleri týraly kadrlar da qoldanyldy.
