Maıra Іlııasova Úrjarda ótken «Jaýqazyn» óner baıqaýynyń qurmetti qonaǵy boldy
ÚRJAR. QazAqparat - Shyǵys Qazaqstan oblysy Úrjar aýdanynda ótken «Jaýqazyn» óner baıqaýyna Qazaqstan Respýblıkasynyń eńbek sińirgen ártisi Maıra Álimǵazyqyzy Іlııasova arnaıy kelip, jas daryndylardyń kontsertin tamashalady, dep habarlaıdy QazAqparat tilshisi.
Aıta keteıik, Úrjar aýdanynda «Jaýqazyn» óner baıqaýy 1995 jyldan bastap ótkizilip keledi. Bıylǵy sharaǵa 2000-nan astam bala qatysyp, onyń úzdik degen 560-y jartylaı fınalda óner kórsetti. Olardyń arasynda ótken jyly Pekınde 8 memlekettiń qatysýymen ótken «Pearl of the east» án baıqaýynyń birinshi oryn ıegeri Nazerke Nurbekqyzy, «Samǵa, juldyz» atty respýblıkalyq balalar jáne jasóspirimder arasyndaǵy án baıqaýynyń jeńimpazdary Nazerke Nurbekqyzy, Baljan Teteǵalıeva, Sultan Jeldibaev, Maıra Іlııasovanyń shyǵarmashylyq keshine qatysqan Qaster Talapqan, «Erligi elge mura» atty halyqaralyq konkýrstyń birneshe márte Gran prı ıegerleri Baný men Ǵalııa Jaqanovalar bar. Bul balalardy ónerge baýlyp kele jatqan ustazdary, «Sonar» halyqtyq án-bı ansambliniń jetekshisi Farıda Tólegenovanyń eńbegi zor ekendigin erekshe atap ótpeske bolmas.
Kesh barysynda sóz alǵan Maıra Іlııasova: «Úrjar jeri, eli óte qasıetti meken. Búgin mine, keremet «Jaýqazyn» balalar shyǵarmashylyǵynyń festıvaliniń arnaıy qonaǵy bolyp otyrmyn. Bul qasıetti jerden áli de talaı juldyzdar shyǵatyndyǵyna senimdimin», - dedi.
Sonymen birge talantty ánshi keshte halyq arasyna keńinen taraǵan birneshe tanymal ánderin oryndady.
Jas juldyzdardyń kontsertin tamashalaǵan QR eńbek sińirgen ártisine Úrjar aýdanynyń ákimi Serik Zaınýldınniń «Alǵys haty» jáne Á.Naımanbaıulynyń medali tabys etildi. Sondaı-aq Maıra Іlııasovaǵa Úrjar aýdanynyń «Qurmetti azamaty» ataǵy berildi.
