Maıonez qosylǵan salatty 6 saǵattan artyq saqtamańyz - Bas sanıtarlyq dáriger
ASTANA. QazAqparat - QR Bas memlekettik sanıtarlyq dárigeri, Qoǵamdyq densaýlyq saqtaý komıtetiniń tóraǵasy Jandarbek Bekshın mereke kúnderi ýlanýdyń aldyn alý boıynsha birqatar keńes berdi, dep habarlaıdy QazAqparat tilshisi.
Ol jańajyldyq dastarhannyń baı ári densaýlyqqa paıdaly bolýy qajettigin eske saldy.
«Ásirese úlkender maıly jáne tym tátti taǵamdardan boıyn aýlaq ustaǵany jón. Salat pen sýsyndy jáne jemis-jıdekti kóbirek qoıý kerek. Taýyq pen balyq etterin aǵza ońaı qorytady, árıne termoóńdeýden ótken qaýipsiz bolsyn. Qazaqsha pisken etti de azdap qoıýǵa bolady. Eń bastysy barlyq taǵamdy ústel ústine shyǵarmaı, tońazytqyshtan az portsııamen alyp tutynǵan durys», - dedi bas sanıtarlyq dáriger Ortalyq kommýnıkatsııalar qyzmetinde ótken baspasóz máslıhatynda.
Sonymen birge, ol taǵamdy jetkilikti etip keshke ǵana ázirleýge, merekeden qalǵan taǵamdy uzaq saqtamaýǵa keńes berdi.
«Merekeden keıin asta-tók taǵamdy laqtyrýǵa qımaıtyndar bar. Biraq, ýlanyp aýyrǵanda kerisinshe, ókinedi. Salattar tońazytqyshta 24 saǵat qana saqtalady, maıonez qosylǵan salattardyń jaramdylyǵy - 6 saǵat qana. Sondyqtan, jeýge qajetti taǵamdardy der kezinde ázirlep, qalǵanyn azyq-túlik plenkasymen saqtaý kerek», - dedi J. Bekshın.
Bas dárigerdiń aıtýynsha, dúkennen azyq-túlik alǵanda jaramdylyq merzimi anyq kórinetin taýarlardy alý kerek. Úıde taǵam ázirlegende bir rettik qolǵap kıip, et pen kókónisterdi bólek pyshaqpen týraǵan jón.
