Maınıng fermalardyń naqty ornalasqan jeri áli anyq emes –Energetıka vıtse-mınıstri

NUR-SULTAN. QazAqparat – QR Energetıka vıtse-mınıstr Jandos Nurmaǵanbetov Senat otyrysynan keıin BAQ ókilderine bergen suhbatynda maınıngke salynatyn salyqty kóterý máselesi týraly pikir bildirdi, dep habarlaıdy QazAqparat tilshisi.

«Qazir maınıng boıynsha vedomstvoaralyq top jumys istep jatyr. Bul jerde maınıngti Energetıka mınıstrligi emes, Tsıfrlyq damý mınıstrligi retteıtinin túsiný kerek. Olar elektr qýatyn tutynady ǵoı. Al elektrmen jabdyqtaý, tapshylyqqa jaýap berý bizdiń mindet bolǵandyqtan vedomstvoaralyq top quramynda jumys istep jatyrmyz.

Onymen birge maınıngke salyq salý máselesi bar. Qazir maınıngke salynatyn salyqty kóbeıtý týraly usynys tústi. Eger biz salyqty kótersek, maınıngtiń shyǵynsyz jumys isteýine qandaı shek kerektigin túsiný kerek. Maınıng degen tabysy joǵary kásip ekendigi de aıtylyp júr. Qysqa ýaqyttyń ishinde úlken aınalymǵa shyqty», - dedi mınıstrlik ókili.

Onyń aıtýyna qaraǵanda, energetıka salasynda qandaı da bir nysan salý úshin túsetin júktemeni josparlap otyrý kerek.

«Maınıngtiń, sonyń ishinde kóleńkeli maınıngtiń júktemesi eldegi energetıka júıesiniń josparynda bolmaǵan. Qytaı tyıym qoıyp edi, bári bizge keldi. Biz tipti olardyń naqty qaıda ornalasqanyn sońyna deıin túsinip otyrǵan joqpyz. Problemanyń bári osynda. Sondyqtan tarazylap sheshim shyǵarý mańyzdy», - dedi vıtse-mınıstr.

Sondaı-aq, ol elde tirkelgen maınıng fermalardyń 700 MVt energııa tutynyp otyrǵanyn aıtty. Olarǵa kóleńkedegi maınerlerdi qossa, bul shyǵyn 1000 MVt-tyń aınalasynda bolýy múmkin degen boljam da keltirdi.