Maınıng fermalar «Astana hub» arqyly 8,5 mlrd teńgeniń jeńildigin alǵan

NUR-SULTAN. QazAqparat – Bes birdeı maınıng ferma «Astana hub» ortalyǵy arqyly 8,5 mlrd teńgeniń jeńildigin alǵan. Bul týraly Respýblıkalyq bıýdjettiń atqarylýyn baqylaý jónindegi esep komıtetiniń Ekonomıkanyń naqty sektoryna aýdıt júrgizý bóliminiń basshysy Aqylbaı Ybyraev aıtty, dep habarlaıdy QazAqparat tilshisi.

Esep komıettinde «Tsıfrlyq Qazaqstan» memlekettik baǵdarlamasyn iske asyrýdyń aralyq baǵalaýy talqylanyp jatyr.

Komıtet ókili Aqylbaı Ybyraev shara aldynda BAQ ókilderine atalǵan baǵdarlama boıynsha jiberilgen kemshilikterdiń keıbiri týraly málimet berdi.

«Tsıfrlyq damý, ınnovatsııalar jáne aeroǵarysh ónerkásibi mınıstrligi memlekettik baǵdarlama arqyly ıgerilgen qarjyǵa qajetti deńgeıde qabyldaý men monıtorıng júrgizbegen. Onyń ústine taldaý formaldy túrde júrgizilgen. Sondyqtan kóptegen sharalardyń tıimdiligin ádiletti baǵalaý múmkin emes. Mysaly, aýdıt kezinde vedomstvoǵa baǵynyshty «Astana hub» uıymynyń bazasynda negizinen krıptovalıýta maınıngimen aınalysqan ınvestıtsııalyq jobalardy anyqtadyq. Bul halyqaralyq ІT-tehnologııalyq parktiń negizgi maqsaty men mindetine kirmeıdi», - dedi komıtet ókili.

Onyń sózine qaraǵanda, atalǵan ınvestıtsııalyq jobalardy 5 kompanııa iske asyrǵan.

«5 uıymnyń bireýi ǵana maınıng ferma retinde tirkelgen. Qalǵany startap-kompanııa retinde tirkelgen. Olardyń bári «Astana hub» uıymynyń bazasynda 8,5 mlrd teńgeniń preferentsııalaryn alǵan. Onyń ishinde salyq jeńildikteri, keńse jaldaý sııaqty basqa da startap jobalarǵa beriletin qoldaýǵa ıe bolǵan. Qoldanystaǵy zańnama boıynsha olardyń bul áreketin zańsyz dep aıtýǵa kelmeıdi. Zańnamanyń eskerýsiz qalǵan tusyn paıdalanǵan deýge bolady. Sondyqtan biz búgin osy olqylyqty retteıtin zańnamalyq ózgeris engizý máselesin usynyp otyrmyz. Búgingi shara qorytyndysy boıynsha birjaqty sheshimge kelemiz dep oılaımyn», - dedi Aqylbaı Ybyraev.

Al QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Asqar Jambaqınnyń aıtýyna qaraǵanda, bul jerde qarjy jelge ushty dep aıtýǵa kelmeıdi.

«Qandaıda bir qarjy jelge ushty degen másele turǵan joq. Olar da ekonomıkanyń sýbektisi retinde, ІT-kompanııa retinde «Astana hub» uıymynyń bazasynda tirkele alady. Qazir bul máseleni sheshý úshin tirkelý erejesine ózgeris engizip jatyrmyz.

«Astana hub» uıymynyń kez kelgen rezıdenti salyq, keńse jaldaý jáne ózge de máseleler boıynsha jeńildikter ala alady», - dedi vıtse-mınıstr.