Maımyldar baqqan maýglı-qyzdyń ata-anasy tabyldy
ASTANA. QazAqparat - Úndistanda maýglı-qyzdyń ata-anasy tabyldy, dep jazady «Habar 24».
Kóp ýaqyt boıy ormanda maımyldarmen birge turǵan kishkentaı qyz adam tilin umytyp, tórt aıaqtap júredi. Balanyń ata-anasynyń aıtýynsha, qyzdary bir jyl buryn bazar mańynda olardan qashyp ketken, dep jazady Daily Mail.
45 jastaǵy Ramzan Alı Shah pen onyń 35 jastaǵy jubaıy Nazma qyzdarynyń sýretin gazet betinen kórgenin aıtady. «Biz óz kózimizge ózimiz senbedik. Qyzymyz bazardaǵy yǵy-jyǵy kisilerdiń arasynda júrip, bizden qashyp ketken edi. Sodan beri ol ushty-kúıli joq bolyp ketti», - deıdi qyzdyń ákesi.
Shah qyzynyń esimi Alıza ekenin jáne onyń 10 jasta ekenin alǵa tartyp otyr. Onyń aıtýynsha, qyz psıhıkalyq dertke shaldyqqan jáne dári satyp alyp turǵan kezde olardan qashyp ketken.
Sondaı-aq Shah jergilikti polıtsııanyń qyzyn taýyp berýge esh qulyq tanytpaǵanyn aıtady. Endi Shah pen onyń jubaıy ormanda tabylǵan qyzdyń ata-anasy ekenin dáleldeý úshin qan tapsyrýlary qajet.
