Maımyl shesheginen 70-ten astam el zardap shekti - DDU

NUR-SULTAN. QazAqparat – Dúnıejúzilik densaýlyq saqtaý uıymy bas dırektorynyń tótenshe jaǵdaılar jónindegi kómekshisi Ibragıma Sose Foll jyldam taralyp jatqan maımyl sheshegin toqtatý úshin elder yntymaqtastyǵyn arttyrýy kerek ekenin aıtty, dep habarlaıdy QazAqparat BUU jańalyqtar ortalyǵynyń saıtyna silteme jasap.

23 shildede DDU vırýstyń taralýyn densaýlyq saqtaý salasyndaǵy halyqaralyq deńgeıdegi jahandyq tótenshe jaǵdaı dep jarııalady . Bul – uıym júıesindegi qaýiptiń eń joǵary deńgeıi. DDU úılestirýdi, elderdiń yntymaqtastyǵyn jáne jahandyq yntymaqtastyqty kúsheıtýge tyrysyp otyr.

«Álem bul adamdardy ultyna, túsine nemese dinine qaramastan qorǵaýy kerek. Meniń oıymsha, bul óte mańyzdy, qazir 70-ten astam el zardap shekken kezde bári áreket ete bastaıdy» , – dep atap ótti doktor Foll.

Doktor Folldyń aıtýynsha, eger biz tek Eýropa men Amerıkada kezdesetin naýqastardy emdeıtin bolsaq, onda biz naqty aýrýdy emes, maımyl shesheginiń tek belgilerin ǵana joıamyz. Bul aýrýmen kúresý úshin búkil álemniń jumylýy asa mańyzdy.

«Bizde Kongo Demokratııalyq Respýblıkasy, Nıgerııa, Ortalyq Afrıka Respýblıkasy, Kamerýnda kóptegen jaǵdaılar boldy, sondaı-aq Gana, Benın sııaqty basqa da elderde jekelegen jaǵdaılar kezdesti. Meniń oıymsha, álem aýyldyq jerlerdiń turǵyndaryn qorǵaýǵa ınvestıtsııa salatyn ýaqyt keldi», - dedi doktor Foll.

Foto: wyomingpublicmedia.org