Maımyl sheshegine kúdik: Sankt-Peterbýrgte bes adam aýrýhanaǵa jatqyzyldy
ASTANA. IKAZINFORM — Reseıdiń Sankt-Peterbýrg qalasynda maımyl sheshegin juqtyrdy degen kúdikpen bes adam aýrýhanaǵa jetkizildi. Naýqastardyń jaǵdaıy jeńil jáne ortasha aýyrlyq dárejesinde dep baǵalanyp otyr. Bul týraly TASS agenttigi jazdy.
Rospotrebnadzordyń Sankt-Peterbýrg qalasy men Lenıngrad oblysy boıynsha óńiraralyq basqarmasynyń málimetinshe, maımyl sheshegin juqtyrýy múmkin degen jaǵdaı týraly aqparat túskennen keıin mamandar sanıtarııalyq-epıdemıologııalyq tekserýdi bastaǵan.
Qazirgi ýaqytta bes adam aýrýhanaǵa jatqyzylyp, dárigerlerdiń baqylaýynda jatyr.
Qalalyq densaýlyq saqtaý komıteti naýqastardyń Botkın atyndaǵy ınfektsııalyq aýrýhanada em qabyldap jatqanyn naqtylady.
— Olar Botkın atyndaǵy aýrýhanada jatyr. Jaǵdaılary jeńil jáne ortasha aýyrlyq dárejesinde. Epıdemıologııalyq tekserýdi Rospotrebnadzor júrgizip jatyr, — dep habarlady komıtet ókilderi.
Qazir mamandar aýrýhanaǵa jatqyzylǵan adamdarmen baılanysta bolǵan azamattardyń barlyǵyn anyqtap jatyr. Sonymen qatar dezınfektsııa júrgizý týraly nusqama berilip, ınfektsııanyń taralýyna jol bermeýge baǵyttalǵan epıdemııaǵa qarsy sharalar kesheni uıymdastyrylǵan.
Rospotrebnadzor ókilderiniń aıtýynsha, maımyl shesheginiń vırýsyn qysqa merzimde anyqtaýǵa múmkindik beretin zamanaýı test-júıeler ázirlenip, tirkeýden ótken.
Aıta keteıik, bıyl aqpan aıynda Taılandtan oralǵan eki reseılikten maımyl sheshegi anyqtalǵan bolatyn.
