Maımyl sheshegine qarsy vaktsınany satyp alýdyń qajeti joq - mınıstrlik

ASTANA. KAZINFORM – Dúnıejúzilik densaýlyq saqtaý uıymy maımyl sheshegine qarsy vaktsınany bekitti. Bul óz kezeginde 20 myńǵa jýyq adam aýrý juqtyrǵan Afrıkadaǵy indettiń taralýyna tosqaýyl qoıýǵa kómektesedi.

QR Densaýlyq saqtaý mınıstrligi Qazaqstandaǵy jaǵdaıdyń turaqty ekenin jáne vaktsına satyp alýdyń qajeti joq ekenin málimdedi.

«Ortalyq Azııada, onyń ishinde Qazaqstanǵa maımyl sheshegin juqtyrǵan naýqastardyń kelý jaǵdaıy tirkelgen joq. El aýmaǵynda tıisti monıtorıng eskerilgen jáne memlekettik shekaradaǵy sanıtarlyq-karantındik beketterde baqylaý kúsheıtildi. Sondyqtan qazir vaktsınany satyp alýdyń qajeti joq», - delingen QR DSM Sanıtarııalyq-epıdemıologııalyq baqylaý komıtetiniń Kazinform agenttigine bergen jaýabynda.

Atalǵan vedomstvo týrıster bul indetti juqtyrmas úshin qandaı aldyn alý is-sharalaryna mán berý kerek ekenin eske saldy. Shetelge shyǵýdy josparlaǵan azamattarǵa osy talaptardy ustaný qajet:

- aımaqtaǵy epıdemıologııalyq jaǵdaıdy zerdeleý;

- indet juqtyrǵan adamdarǵa jaqyndamaý;

- naýqastarǵa kútim jasaý kezinde maska taǵyp, arnaıy qolǵaptardy paıdalaný;

- aýrý belgiler bolsa, dereý dárigerge habarlasý;

- shetelden oralǵannan keıin 21 kún ishinde sımptomdar paıda bolsa, shuǵyl túrde medıtsınalyq kómekke júginip, osyǵan deıingi saıahat týraly habarlaý kerek.

Eske salsaq, jaqynda danııalyq Bavarian Nordic A/S kompanııasynyń MVA-BN vaktsınasy maımyl sheshegine qarsy alǵashqy ekpe boldy.

Tamyz aıynyń sońynda 2024 jyldyń basynan beri Afrıka elderinde mpox vırýsyna (maımyl shesheginiń jańa ataýy) shaldyqqandar sany 22,8 myń adamǵa jetkeni habarlandy.

QR Densaýlyq saqtaý mınıstrligi álemdegi maımyl shesheginiń jaǵdaıy týraly jáne elimizdiń aýmaǵynda ınfektsııanyń taralýyn boldyrmaý boıynsha qabyldanǵan sharalar týraly málimet jarııalady.