Maımyl sheshegi: shekarada sanıtarııalyq baqylaý kúsheıtildi
ASTANA. KAZINFORM – Densaýlyq saqtaý mınıstrligi elde maımyl shesheginiń paıda bolýy yqtımaldylyǵyn joqqa shyǵarmaıdy, alaıda ınfektsııanyń halyq arasynda keńinen taralý qaýpi tómen dep baǵalanady.
Mınıstrliktiń baspasóz qyzmetiniń habarlaýynsha, vedomstvo álemdegi ınfektsııalyq aýrýlardyń, onyń ishinde maımyl shesheginiń epıdemıologııalyq jaǵdaıyna turaqty monıtorıng júrgizip keledi. Álemniń jekelegen elderinde aýrý jaǵdaılarynyń tirkelýi jáne halyqaralyq kólik qatynastarynyń belsendiligi ınfektsııanyń Qazaqstanǵa ákeliný yqtımaldyǵyn joqqa shyǵarmaıdy. Sonymen qatar qozdyrǵyshtyń berilý erekshelikterin eskere otyryp, el halqy arasynda aýrýdyń keńinen taralý qaýpi tómen dep baǵalanyp otyr.
Infektsııanyń elge ákelinýi men taralýynyń aldyn alý maqsatynda Qazaqstan Respýblıkasy Bas memlekettik sanıtarııalyq dárigeriniń 2024 jylǵy 26 tamyzdaǵy № 8 qaýlysyna sáıkes sanıtarııalyq-profılaktıkalyq jáne epıdemııaǵa qarsy is-sharalar kesheni júrgizip jatyr.
Atap aıtqanda, memlekettik shekaradaǵy ótkizý pýnktterinde sanıtarııalyq-karantındik baqylaý kúsheıtildi. Aýrý jaǵdaılary tirkelgen elderdegi epıdemıologııalyq jaǵdaıǵa jáne osy memleketterden kelgen azamattarǵa monıtorıng júrgizilip jatyr. Barlyq ótkizý pýnktteri men sanıtarııalyq-karantındik pýnktter dene temperatýrasyn janaspaı ólsheıtin quraldarmen jabdyqtalǵan.
Sonymen qatar medıtsınalyq uıymdar men zerthanalardyń ınfektsııany ýaqtyly anyqtaýǵa jáne dıagnostıkalaýǵa daıyndyǵy qamtamasyz etilý ústinde. Asa qaýipti ınfektsııaǵa kúdik týyndaǵan jaǵdaıda habarlaý jáne vedomstvoaralyq ózara is-qımyl jasaý algorıtmderi bekitilip, qoldanysqa engizilgen.
Epıdemıologııalyq jaǵdaıǵa baılanysty erekshe nazar aýdarýdy qajet etetin elderdiń tizbesi álemdegi ahýaldyń ózgerýine qaraı turaqty túrde jańartylyp otyrady. Kóliktiń barlyq túrinde júrgizilgen sanıtarııalyq-karantındik baqylaý nátıjesinde asa qaýipti ınfektsııalarmen aýyrǵan nemese olarǵa kúdik týdyratyn adamdar anyqtalǵan joq.
Maımyl sheshegi – MPXV vırýsy qozdyratyn vırýstyq aýrý. Infektsııa negizinen juqtyrǵan adammen tyǵyz fızıkalyq baılanys kezinde, sonyń ishinde teridegi bórtpelermen jáne bıologııalyq suıyqtyqtarmen janasý arqyly beriledi. Sondaı-aq lastanǵan kıim, tósek-oryn jabdyqtary men basqa da zattar arqyly, sondaı-aq ınfektsııa juqtyrǵan janýarlarmen baılanysta bolǵan kezde juǵýy múmkin.
Aýrýdyń negizgi belgilerine dene qyzýynyń kóterilýi, bas aýrýy, bulshyqetterdiń aýyrýy, lımfa túıinderiniń ulǵaıýy jáne teri bórtpeleri jatady.
Infektsııanyń aldyn alý úshin Densaýlyq saqtaý mınıstrligi terisinde sebebi belgisiz bórtpeleri nemese basqa da ınfektsııalyq aýrý belgileri bar adamdarmen tyǵyz fızıkalyq baılanystan aýlaq bolýdy jáne jeke bas gıgıenasy qaǵıdalaryn saqtaýdy usynady. Sondaı-aq ınfektsııaǵa kúdik týdyratyn adamdardyń jeke zattaryn, kıimderi men tósek-oryn jabdyqtaryn ortaq paıdalanbaý qajet.
-Aýrýǵa tán belgiler paıda bolǵan jaǵdaıda, ásirese aýrý tirkelgen elderge barǵannan keıin, ýaqtyly medıtsınalyq kómekke júginip, medıtsına qyzmetkerine saparlar men yqtımal baılanystar týraly habarlaý kerek,-delingen habarlamada.
Densaýlyq saqtaý mınıstrligi epıdemıologııalyq jaǵdaıǵa monıtorıng júrgizýdi jalǵastyryp, halyqtyń densaýlyǵyn saqtaý jáne eldegi sanıtarııalyq-epıdemıologııalyq salamattylyqty qamtamasyz etý úshin qajetti sharalardy qabyldap jatyr.
Osyǵan deıin Reseıdiń Sankt-Peterbýrg qalasynda maımyl sheshegin juqtyrdy degen kúdikpen bes adam aýrýhanaǵa jetkizilgeni týraly jazdyq.
