Maıly daqyldardyń 90%-y elde óńdeledi
ASTANA. KAZINFORM – 2024–2025 jyldary Qazaqstannyń maı salasy álemdik naryqta ornyn aıtarlyqtaı nyǵaıtty. Bul týraly Saýda jáne ıntegratsııa mınıstrliginiń baspasóz qyzmeti habarlady.
Ósimdik maıy men shrot eksporty 1,3 mln tonnadan asyp, eksport kólemi 837 mln dollar boldy.
— Bıyl Qazaqstan kúnbaǵys maıyn eksporttaý boıynsha álemde 6-orynǵa kóterilip, Eýroodaq elderine kúnbaǵys shrotyn jetkizetin negizgi 3 memlekettiń qataryna kirip otyr.
Agrarlyq eksporttyń jalpy kórsetkishteri de osy úrdisti rastaıdy. QazTrade málimetinshe, 2025 jyly aýyl sharýashylyǵy ónimderiniń eksporty 37,8%-ǵa ósip $7,13 mlrdqa jetken.
Bul kezdeısoq ósim emes. Sala birtindep shıkizattyq baǵyttan tereń óńdeýge kóship jatyr. Qazaqstanda ósiriletin maıly daqyldardyń 90 paıyzdan astamy el ishinde óńdeledi. Syrtqy naryqqa daıyn, qosylǵan quny joǵary ónim shyǵarylyp jatyr, — delingen habarlamada.
Ulttyq maıly daqyldardy óńdeýshiler qaýymdastyǵynyń tóraǵasy ıAdykar Ibragımovtyń aıtýynsha, sońǵy jyldary sala túbegeıli transformatsııadan ótti.
— Buryn Qazaqstan negizinen shıkizat eksporttaıtyn. Qazir biz shetel naryqtaryna óńdelgen ónim shyǵaryp otyrmyz. Kásiporyndardy jańǵyrtý, jumys qýatyn arttyrý jáne logıstıkany damytý nátıjesinde kúnbaǵys maıynyń eksporty álemde kóshbastap tur. Aldaǵy maqsatymyz úzdik úshtikke ený jáne salanyń valıýtalyq túsimin 2 mlrd dollarǵa deıin jetkizý, — dedi ol Almatyda ótken dóńgelek ústelde.
2021 jyldan beri salanyń jumys qýaty 2,5 ese ósti. Negizgi eksporttyq baǵyttar — Qytaı, Ortalyq Azııa elderi jáne Eýroodaq. Bul naryqtarda ósimdik maıy men shrot ımporty jylyna 40 mln tonnadan asady. Bul Qazaqstan úshin úlken múmkindik. Salanyń búgingi qarqyny Memleket basshysy belgilegen tereń óńdeýdi damytý jáne eldiń syrtqy naryqtaǵy pozıtsııasyn nyǵaıtý baǵytymen tolyq úılesedi.
Aıta ketelik Qazaqstan álemdik kúnbaǵys maıy eksportynda 8-orynǵa ıe bolǵan edi.