Maıly daqyldardy qarjylandyrý kólemi 2,6 ese artty
ASTANA. KAZINFORM – Fermerler egis qurylymyn ártaraptandyrýdy kúsheıtip, qosylǵan quny joǵary daqyldardy ósirýge basymdyq berip jatyr. Bul úrdisti «Azyq-túlik kelisimshart korporatsııasynyń» forvardtyq satyp alý baǵdarlamasynyń nátıjeleri de rastap otyr.
Aýyl sharýashylyǵy mınıstrligi málimetinshe, ótken agrarlyq maýsymmen salystyrǵanda maıly daqyldardy qarjylandyrý kólemi 2,6 ese – 36 myń tonnadan 95 myń tonnaǵa deıin ulǵaıdy.
Jalpy kúzgi egin jınaý naýqanynan keıin aýyl sharýashylyǵy taýaryn óndirýshiler ulttyq astyq operatorynyń resýrstaryna 479,8 myń tonna astyq jáne maıly daqyl ónimderin jetkizedi. Onyń 337,3 myń tonnasy nemese shamamen 70%-y bıdaı bolady. Qalǵan kólemdi marjasy joǵary daqyldar – maıly zyǵyr, arpa, kúnbaǵys, raps jáne júgeri quraıdy.
2026 jylǵy egis naýqany barysynda aýyl sharýashylyǵy taýaryn óndirýshiler kúnbaǵys egiletin alqaptardyń kólemin edáýir ulǵaıtty. Eger ótken agrarlyq maýsymda forvardtyq kelisimsharttar aıasynda 19,9 myń tonna kúnbaǵys tuqymyn satyp alýǵa qarjy bólinse, bıyl kelisimshart jasalǵan ónim kólemi eki esege jýyq artyp, 37,8 myń tonnaǵa jetti. Dástúrli túrde «Azyq-túlik kelisimshart korporatsııasynyń» resýrstaryna eń kóp ónimdi elimizdiń astyq beldeýindegi sharýashylyqtar jetkizedi.
Qostanaı oblysynyń agrarshylary 228,6 myń tonna astyq jáne maıly daqyl ónimderin, Soltústik Qazaqstan oblysynyń aýyl sharýashylyǵy taýaryn óndirýshileri – 162 myń tonna, al Aqmola oblysynyń agrokásiporyndary 68,3 myń tonna ónim jetkizedi. Almaty oblysy men ózge de ońtústik óńirlerdegi aýyl sharýashylyǵy taýaryn óndirýshilerge memlekettik qoldaý sharalaryn keńeıtý maqsatynda agroónimderdi forvardtyq qarjylandyrý baǵdarlamasyna júgeri satyp alý engizildi. Qarjylandyrylatyn daqyldar tiziminiń keńeıýi fermerlerge naryqtaǵy suranystyń ózgeristerine jedel den qoıyp, ósimdik sharýashylyǵyndaǵy suranysqa ıe ári rentabeldi baǵyttardy damytýǵa múmkindik berdi.
