Maıly daqyldar ósimdik sharýashylyǵynyń tabys draıverine aınaldy - Saparov

ASTANA. KAZINFORM – Maıly daqyldar ósimdik sharýashylyǵynyń tabystylyq draıverine aınaldy. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

- Qazirgi ýaqytta aýyl sharýashylyǵy ónimderin qaıta óńdeý salasy turaqty ári serpindi damý baǵytyn kórsetýde. 2025 jyldyń qorytyndysy boıynsha tamaq ónimderin óndirý kólemi 3,9 trln teńgege jetip, 8,1 paıyzǵa ósti. Negizgi kapıtalǵa ınvestıtsııalar 2 esege artyp, 389 mlrd teńgege jetti. Ótken jyldyń 11 aıynda qaıta óńdelgen ónim eksporty 3,2 mlrd AQSh dollaryn qurap, 33,8 paıyzǵa ósti. Sonymen qatar, agroónerkásiptik kesheni eksportyndaǵy qaıta óńdelgen ónimniń úlesi 52 paıyzdy qurady, - dedi mınıstr.

Onyń atap ótýinshe, munyń bári óndiristi ártaraptandyrý men qosylǵan quny joǵary ónimderdi ulǵaıtýǵa baǵyttalǵan júıeli jumystyń nátıjesi.

- Osylaısha, ósimdik sharýashylyǵy salasynda egis alqaptaryn álemdik naryqta suranysqa ıe ári joǵary rentabeldi daqyldarǵa kóshý júrgizilýde. Búginde maıly daqyldar ósimdik sharýashylyǵynyń tabystylyq draıverine aınaldy. 2025 jyly olardyń ónimi alǵash ret 4,9 mln tonnaǵa jetip, 48 paıyzǵa ósti. Onyń ishinde kúnbaǵys – 39, zyǵyr – 77 paıyzǵa, raps 2,2 esege artty. Sonymen qatar dalalyq jumystardy júrgizýge jyldyq 5 paıyz mólsherlememen 12 aıdan 15 aıǵa deıingi merzimge jeńildetilgen kredıtter bólinýde. Olardyń qaıtarymdylyǵy shamamen 99 paıyzdy quraıdy, - dedi Aıdarbek Saparov. 

Aıta keteıik, Úkimet otyrysynda ekonomıkany odan ary ártaraptandyrý tásilderi pysyqtalyp jatyr.